Бразилийн Ерөнхийлөгч Жайр Болзонаро коронавирусийг энгийн нэг ханиад гэж үзэн, амны хаалт зүүхгүй байхыг уриалж байсан юм. Тэгвэл Ерөнхийлөгч коронавирусийн халдвар авсныг олон улсын эх сурвалжууд мэдээлж байна.

Өнгөрсөн долоо хоногийн ням гарагт Болзонарод халдварын шинж тэмдэг илэрч, өндөр халуурснаар энэ долоо хоногийн даваа гарагт дөрөв дэх удаагаа Ковид-19-ийн шинжилгээ өгөхөд коронавирусээр халдварласан нь илэрчээ. Бразил улс халдварын 1,6 сая тохиолдлоор Америкийн дараа дэлхийд хоёрдугаарт орж байгаа ч төрийн тэргүүн хорио цээрийн дэглэмийг эсэргүүцэж, эдийн засгаа аврахыг шаардсан юм.

Телевизээр хийсэн мэдэгдэлдээ Ерөнхийлөгч жаахан халуурч байгаа ч дажгүй сайн байна хэмээн ярьжээ. Төрийн тэргүүн энэ жил 65 настай бөгөөд энэ насны хүмүүс халдвар авах хамгийн өндөр эрсдэлтэй бүлгийн хүмүүс юм. Тэрээр Америкийн Ерөнхийлөгч Дональд Трампын зөвлөснөөр халдвараас урьдчилан сэргийлж гидроксихлорохин эмийг ууж байсан ажээ.

Холбогдох албаны хүмүүс Ерөнхийлөгчтэй уулзсан ойрын хавьтлын хүмүүсийг олж халдварын шинжилгээ хийх ажлыг зохион байгуулж байна. Дэлхийн эрүүл мэндийн байгууллагын дэд дарга Майк Райн Ерөнхийлөгч Болзонарог түргэн эдгэхийг хүсч, түүнд тохиолдсон явдал нь коронавирусийн хор хөнөөлийг тодхон харууллаа хэмээн ярьжээ.

Дэлхий даяар коронавирусийн халдварын 12 сая орчим тохиолдол бүртгэгдэж, 550,000 хүн нас бараад байна. АНУ-д халдварын тохиолдол гурван сая давжээ.

Эх сурвалж: ВВС

---