ӨМӨЗО-ы Баяннуурын малчин тарваган тахал туссан болох нь батлагдсан талаарх хотын эрүүл мэндийн хорооны мэдэгдлийн дагуу “Шиньжинбао” сонинд энэ тухай мэдээлжээ.

Хорооны мэдэгдэлд “Өвчтөн тарваган тахлаар өвчлөхөөсөө өмнө халдварын голомт цэгт байсан. Одоо өвчтөнийг тусгаарлан, эмчилгээ хийж байгаа бөгөөд түүний биеийн байдал тогтвортой байна” гэсэн байжээ.

Тарваган тахлаар өвчилсөн энэхүү эрэгтэй долдугаар сарын 4-ны өдөр эмнэлэгт хэвтсэн бөгөөд удалгүй Баяннуур хотын Урадын дундад хошуунд халдварт өвчнөөс сэргийлэх гуравдугаар түвшний аюулын түгшүүр зарласан байна. Эрх баригчдын үзэж буйгаар халдвар хотын хүн амын дунд тархах эрсдэлтэй байгаа ба иргэдийг зэрлэг амьтан агнахаас зайлсхийхийг уриалан, сэжигтэй тохиолдол илэрсэн нөхцөлд албаныханд даруй мэдээлэхийг хүсэж байгаа аж.

“Риа Новости” агентлагаас “Алтайн Бүгд Найрамдах Улстай хиллэдэг Монгол Улсын нутагт мөн хоёр хүн тарваган тахлаар өвчилжээ” хэмээн мэдээлсэн байна. Улаанбаатар дахь ОХУ-ын Элчин сайдын яам Монгол улсын эрх баригчид шаардлагатай арга хэмжээг яаралтай авсан тул санаа зовох зүйлгүй гэж мэдэгдсэн гэв. Уг мэдээний төгсгөлд “Хэдий хориотой ч Монголын оршин суугчид тарваганы махыг хүнсэндээ хэрэглэдэг тул тарваган тахал тархсан” хэмээн онцолжээ.

Эх сурвалж: Риа Новости

---