Амралт зугаалгын цаг ирж, энэ жил иргэд дотооддоо аялж амарч байгаа билээ. Гэвч амарч байхдаа уул хадаар авирч, гол усанд орохгүй байхыг мэргэжлийн байгууллагууд сануулж байгаа.

Тэгвэл энэ сарын 4-нд Улаанбаатарт хотоос Хэнтийн аймгийн Дадал сумын чиглэлд гэр бүлийн хамт аялж явсан Баянгол дүүргийн харьяат Н /6 настай, эмэгтэй/ тус сумын угтах хаалганы хөшөө баримлаас унаж, осолдсон хэрэг гарчээ.

Тухайн охины хувьд хэвлийн хэсэгт цус алдаж, нарийн гэдэс тасарсан тухай дуудлагыг ар гэрийнхэн нь энэ сарын 5-ны өдөр өгч тус сумын Эрүүл мэндийн төвийн их эмч Ж.Батсүрэн Н-д хагалгаа хийсэн. Ар гэрийн хүсэлтээр Зэвсэгт хүчний 303 дугаар ангийн МИ-171Е загварын нисдэг тэрэгний багийн дөрвөн гишүүн, ГССҮТ-ийн дөрвөн эмч, нийт найман хүний бүрэлдэхүүнтэй нисдэг тэрэг энэ сарын 5-ны 12:06 цагт Улаанбаатар хот-Хэнтий аймгийн Баян-Адарга сум-Улаанбаатар хотын чиглэлд хөөрч, Хэнтий аймгийн Баян-Адарга сумаас өвчтөнг авч мөн өдрийн 17:02 цагт Улаанбаатар хотод бууж, өвчтөнг ГССҮТ-ийн Сэхээн амьдруулах тасагт хэвтүүлсэн байна.

Энэ мэтчилэн амралт зугаалгаар явж байгаа иргэд сонор сэрэмжтэй байхыг анхааруулж байна.

---