Хуульч, өмгөөлөгч Б.Мэргэнтэй УИХ-ын гишүүн Ж.Эрдэнэбатыг цагдан хорьж, шүүж байгаа асуудлаар байр суурийг нь сонслоо. Учир нь тэрээр "Тэээээр дээр байгаа дарга, шүүх хоёрт хууль хамаагүй боллоо" хэмээн ярьж, бичиж байгаа юм. 

Хуульч, өмгөөлөгч Б.Мэргэн: 

-Сонгуулийн өмнөх процессууд дээр маргаантай зүйлүүд нэлээд гарлаа. Гишүүний халдашгүй байдлыг цуцлахын тулд прокурорын байгууллагаас УИХ-д хүсэлт гаргаж байсныг бид мэднэ. УИХ-ын гишүүн Н.Гантулга, Н.Номтойбаяр нарын тухай энд дурдаж болно.

Гэтэл Ж.Эрдэнэбат гишүүний хувьд халдашгүй байдал нь хэвээр байсан. Нэр дэвшигчийн халдашгүй байдал бас үйлчилж байсан. Аль алинд нь нэг бол УИХ, нөгөө бол СЕХ-ноос зөвшөөрөл авах ёстой. Аль алинаас нь зөвшөөрөл аваагүй. Би гишүүний халдашгүй байдал нь байхад яагаад цагдан хорив гэдэг дээр нь илүүтэй гайхаад байгаа. Гэтэл шүүхээс шүүх шүүж байгаа үед халдашгүй байдлын талаар Их хурлаас асуухгүй гэдэг байдлаар тайлбарласан юм шиг байна лээ. 

Өнгөц харахад гишүүний халдашгүй байдлыг цуцлахын тулд прокуророос хүсэлт гаргаад байгаа юм шиг боловч, олон улсын эрх зүйн тогтолцоогоор яалт ч үгүй УИХ-аас зөвшөөрөл авах ёстой. Яагаад гэвэл, олонх нь цөөнхийгөө замаасаа зайлуулахын тулд ямар нэг аргаар шоронд хийгээд байж л дээ. Эсвэл, сонгуульд өрсөлдөж байсан өрсөлдөгч нь ялж магадгүй болонгуут яаж ийгээд гэмт хэрэгт холбогдуулаад байж л дээ. Үүн шиг Засгийн газар гишүүдээ нэг, нэгээр нь намнаад унавал яах вэ.

Ер нь бол шүүх парламентийн дархлаа руу халдахаас хамгаалж, гишүүний халдашгүй эрхийг гаргасан. 

-Арван тэрбумын барьцааны талаар? 

-Барьцааны талаар ганцхан тодорхой заалт бий. "Тухайн гэмт хэргийн шинж байдал, шүүгдэгчийн хувийн байдлыг харгалзана" гэсэн. Арван тэрбум бол Монголын шүүхийн практикт өмнө нь байгаагүй мөнгөн дүн. Англи зэрэг оронд ч 1 сая ам.долларыг олон улсын сүлжээ дагасан гэмт хэрэгтэнд л ийм барьцаа ногдуулдаг шүү дээ. Гэтэл манайд анх удаа 3,5 сая ам.долларын барьцааг нэхсэн. Шүүх барьцааг үнэхээр бодитой тогтоож чадсан уу? 50 мянган төгрөгийн цалинтай хүнийг 1 сая төгрөгөөр торгож болохгүйтэй адил юм. Нөгөөтэйгүүр, арван тэрбумыг байршуулсан бол яах байсан юм? Хаанаас ийм их мөнгө олов гээд шалгаад унах юм уу. Хувь хүн байтугай, томоохон аж ахуйн нэгж ч гаргаж чадахгүй мөнгө барьцаанд тавихыг шаардсан. 

-Ж.Эрдэнэбат гишүүнийг суллахгүй, ял оноовол яах вэ? 

-Монголын эрх зүйн практикт анх удаа ийм зүйл тохиолдож байна. Хэрхэн шийдсэнээс хамаараад практик тогтоно.

---