Улсын их баяр наадмыг “XIII зуун” цогцолборт хийхээр товлон, “Hero”-ийн Б.Баатар найруулж буй. Гурван тэрбум төгрөг зарцуулах өнөө жилийн наадмыг “Монгол наадам” контент бүтээгдэхүүн болгож, дэлхийд сурталчлах гэж буйгаа Б.Баатар онцолсон.

Тэгвэл өнөөдөр зарим хэвлэлээр “Наадмын үеэр хамгаалалтад гарах цагдаагийн албан хаагчдад дүрэмт хувцас бус монгол баатрын дээл өмсгөхөөр болжээ” гэх мэдээлэл цацагдсан.

Энэ талаар Соёл урлагийн газрын дарга Г.Эрдэнэбатаас тодруулахад “Монгол орчинг түүхчлэн харуулсан телевизийн контент бэлтгэж буйд баяртай байгаа. Надад байгаа мэдээллээр дан гац сур харваад өнгөрөх бус үүх түүхтэй нь, дуу хууртай, өв соёлыг нь тодотгож харуулахаар бэлтгэж байгаа гэсэн. Иймээс уг контент оролцож байгаа хүмүүсийн хувьд дээл хувцастай байх нь зүй ёсны. Гэхдээ хамгаалалтад гарч байгаа цагдаа нарт монгол баатрын дээл хувцас өмсгөнө гэсэн мэдээлэл бол сонсоогүй” хэмээв.

Түүнчлэн баяр наадмын соёл урлагийн үзүүлбэр хариуцаж байгаа албаны хүнээс тодруулахад “Одоогоор цагдаа нарт дээл хувцас өмсгөнө гэсэн зүйл яригдаагүй. Найруулагч Б.Баатараас асуувал мэдэх байх” гэх хариулт өгсөн юм.

Нийслэлийн цагдаагийн удирдах газрын Урьдчилан сэргийлэх хэлтсийн дарга, цагдаагийн хурандаа Л.Амармөрөн “Энэ талаарх мэдээлэл бидэнд ирээгүй. Цагдаа нар дүрэмт хувцастайгаа хамгаалалтад гардгаараа гарна” хэмээсэн юм.

Цагдаа нар баатрын хувцас өмсөх эсэхийг Б.Баатар найруулагчаас тодруулах гэсэн боловч утсаа авсангүй.

Энэ жилийн Үндэсний Их баяр наадмыг бүхэлд нь “Монгол наадам” контент болгон боловсруулж, олон Улсад аялал жуулчлалын брэнд бүтээгдэхүүнээр түгээн сурталчлах видео бүтээл болгож авч үлдэх. Монголчуудын төрт ёсны уламжлал, үүх түүх, эрийн гурван наадам, ард иргэдийн хувцас хэрэглэлийн соёл, ахуй нөхцөл, гэр бараа зэргийг Их Монгол Улсын үеийнхээр үзүүлэхээр дэглэн найруулж байгаа талаараа “Hero” энтертаймэнтийн захирал Б.Баатар өчигдөр холбогдох албаныханд дурдсан ажээ.

“XIII зуун” цогцолборт бөх, үндэсний сур, Хүй долоо худагт хурдан морины уралдааныг зохион байгуулах өнөө жилийн наадмыг 16 телевиз шууд дамжуулна.

---