Энэ долоо хоногт зам тээврийн ослын шинжтэй 799 дуудлага мэдээлэл бүртгэгдсэн байна. Бүртгэгдсэн зам тээврийн ослын улмаас 23 хүн гэмтсэн. Эдгээрийн долоо нь хүүхэд байна. Ноцтой зам тээврийн ослын улмаас нийслэлд гурав орон нутагт  таван хүний амь нас хохирсноос долоон настай хүүхдийг мөргөж амь насыг нь хохироосон байна.

 Нийт хүн бэртсэн, амь нас хохирсон ослыг хэлбэрээр нь авч үзвэл:

•  Явган зорчигч мөргөх хэлбэрээр -10
•  Мөргөлдөх хэлбэрээр-5
• Онхолдох хэлбэрээр-3
• Үл хөдлөх зүйл мөргөх хэлбэрээр-1
• Мопед, мотоциклтой мөргөлдөх хэлбэрээр-3 тус тус бүртгэгдсэн байна.

 Алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 105 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 19 хүнийг шүүхээр баривчилж хуулийн дагуу хариуцлага тооцсон байна. 

Согтуугаар тээврийн хэрэгсэл жолоодож зам тээврийн осол гаргасан 11 зөрчил бүртгэгдсэн.

Явган хүний гарц, уулзварт явган зорчигчид зам тавьж өгөөгүй 1715 жолоочид Монгол Улсын Зөрчлийн тухай хуулийн 14.7.38-д заасны дагуу арга хэмжээ тооцож ажилласан.

Иймд замын хөдөлгөөнд оролцогч та бүхэн замын хөдөлгөөний дүрмийн өөрт хамааралтай заалт, шаардлагыг сахин биелүүлж, явган зорчигч нь явган хүний гарц, гарамтай хэсгээр зам хөндлөн гарч хэвших, жолооч явган хүний гарцан дээр зам тавьж өгсөн тохиолдолд зорчих хэсэг дээр алгуурлалгүй, түргэн шуурхай зам хөндлөн гарах, мөн чихэвч зүүсэн үедээ зам хөндлөн гарахгүй байхад анхаарна уу.

---