Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхийн гадаа Сэлэнгэ нутгийн иргэд эсэргүүцэл илэрхийлж, уриа, лоозон барьж жагсаад хоёр дахь өдрөө болж байна. Тэдэнд цагдаагийн байгууллагаас Зөрчлийн хуулиар шаардлага, шахалт үзүүлжээ. 

Манай сурвалжлах багийг очиход иргэд уриа, лоозонгоо шүүхийн өмнөх хашааны хананд наасан байлаа. Учрыг асуухад цагдаагийн байгууллагаас жагсаал цуглаанаа тараа, уриа лоозон барьж болохгүй, орилж, хашгирвал Зөрчлийн хуулиар хариуцлага тооцно гэж анхааруулсан байв. Жагсагчид энэхүү шаардлагыг хүлээж аван, чимээгүй байгаа боловч, уриа лоозонгоо барьж болохгүй гэсэн учир хананд наасан учраа тайлбарлав. Мөн, ойр орчмоо цэвэрхэн байлгах үүднээс хог түүх ажилд бүгд шаламгайлан оржээ. 

УИХ-ын гишүүн Жаргалтулгын Эрдэнэбатыг сонгуулийн сурталчилгаа хийж явах үед нь Үндсэн хууль, Сонгуулийн тухай хууль, УИХ-ын тухай зэрэг томоохон гурван хуулийг зөрчин цагдан хорьж, шүүж байгаа билээ. Гэвч сэлэнгийн сонгогчид түүнд дахин итгэл хүлээлгэн УИХ-ын гишүүнээр сонгосон. Иймд "Хүнээ авъя", "Бидний сонголтыг чөлөөл" гэх зэрэг уриа лоозонг барьж жагсаад хоёр дахь өдөртэйгээ золгож байгаа юм. 

Ж.Эрдэнэбатыг ийн шүүж байгаа нь сэтгүүлч Г.Отгонбаярын тэмдэглэсэнчлэн халдашгүй эрхтэйгээ хоригдсон
анхны УИХ-ын гишүүн, СЕХ-ны зөвшөөрөлгүй хоригдсон хоёр дахь нэр дэвшигч, шоронгоос сонгогдсон анхны
УИХ-ын гишүүн, хоригдсон тав дахь Ерөнхий сайд болоод байна. 

Анхан шатны шүүх хуулийг тайлбарлаж, хуулийг илт гуйвуулан зөрчиж байгааг эсэргүүцсэн Сэлэнгэ нутгийн иргэдийн жагсаалын талаар бид дахин мэдээлэх болно.

---