Хэнтий аймгийн Дадал сумын харьяат малчин Б /39 настай, эрэгтэй/, С /5 настай, эмэгтэй/ нар гэрээсээ мотоциклоор өнгөрсөн сарын 23-нд гараад сураггүй болсон тул тэднийг эрэн хайх ажиллагааг 10 дахь хоногтоо үргэлжлүүлж байна. 

Эрэн хайх ажиллагааны үр дүнд өнгөрсөн сарын 29-ний өдөр 5 настай С-ийн цогцсыг олж цагдаагийн байгууллагад шилжүүлсэн өгчээ. Энэ сарын 2-ны өдрийн байдлаар малчин Б-ыг эрэн хайх ажиллагааг “Зуны гарам" гэдэг газраас баруун урд зүгт “Доод гарам" гэдэг газар хүртэл 40 км-т “Хярхан” голоор зохион байгуулж, 3 метрийн гүнд 5 удаа шумбалт хийж үр дүнд хүрээгүй тул 20:30 цагт түр зогсоон өнөөдөр 05:00 цагт эрэн хайх ажиллагааг эхлүүлсэн.

Түүнчлэн Завхан аймгийн Улиастай сумын Богдын гол багийн “Цагааннуур” гэдэг газар тус сумын харьяат малчин У /25 настай, эмэгтэй/ энэ сарын 30-ы өдөр гэрээсээ гараад сураггүй болжээ. Сураггүй болсон тухай дуудлагыг өчигдөр өгч тус аймгийн Онцгой байдлын газрын Эрэн хайх, аврах бүлгийн алба хаагчид, ар гэрийнхэн “Цагааннуур” гэдэг газраас “Харуулын-Өвөр” гэдэг газар хүртэл 5 км-ийн тойрогт эрэн хайх ажиллагааг зохион байгуулж, үзэгдэх орчин хязгаарлагдсан тул эрэн хайх ажиллагааг мөн өдрийн 22:00 цагт түр зогсоосон дахин үргэлжлүүлэхээр болжээ. 

Дорнод аймгийн Халхгол сумын Цогтсүмбэр багийн “Халхын гол” гэдэг газар тус сумын харьяат Т /3 настай, эрэгтэй/ энэ сарын2-ны өдрийн 14:00 цагийн орчим “Халхын гол”-ын эрэг дээр сууж байгаад сураггүй болжээ. 

Эрэн хайх ажиллагааг “Халхын гол” гэдэг газраас хойд зүгт 8 км-ын тойрогт голын эрэг дагуу явганаар болон завьтай самналт хийж, тогтоол ус болон голын эрэг дагуу агаараас нисдэг төхөөрөмж ашиглан зохион байгуулсан боловч үзэгдэх орчин хязгаарлагдсан тул мөн өдрийн 21:00 цагт түр зогсоосон. Эрэн хайх ажиллагааг өнөөдөр дахин эхлүүлсэн.

 

---