УИХ-ын гишүүн асан Н.Номтойбаярын шүүх хурал завсарлалаа. Маргааш 09:00 цагаас үргэлжлэхээр болов. Харин УИХ-ын гишүүн Ж.Эрдэнэбат нарын шүүх хурал үргэлжилж байгаа талаар Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн хэвлэлийн ажилтан Н.Гэрэлтуяа мэдээллээ. 

Хэвлэлийн ажилтан Н.Гэрэлтуяа: 

-Шүүх хуралдаанд шүүгдэгч гаргасан хүсэлтийн дагуу түүнийг өмгөөлүүлэх эрхээр хангах үүднээс шүүх хуралдаан өмнө гурван удаа хойшлуулсан. Гэвч өнөөдрийн шүүх хуралдаанаар дахин шинээр өмгөөлөгч авч, уг өмгөөлөгч нь хэргийн материалтай танилцахаар шүүх хуралдааныг хойшлуулах тухай хүсэлт гаргаж байгаа нь шүүн таслах ажиллагаанд санаатайгаар саад учруулж байна гэж үзэх үндэслэлтэй байх тул шүүх хуралдааныг хойшлуулах боломжгүй гэж шүүх үзэж, гэм бурууг хэлэлцэж, маргааш үргэлжлүүлэхээр болов. 

Харин шүүгдэгч Ж.Эрдэнэбат нарын хэрэг өмнө нь хоёр удаа хойшилсон. Шинээр авсан өмгөөлөгч авч, хэргийн материалтай танилцах хүсэлт гаргасныг нь шүүгч шүүх хуралдаанд санаатайгаар саад учруулж байна гэж үзэж, татгалзсан. Үүний дараа шүүгдэгч Ж.Эрдэнэбат хэргийг шүүж байгаа шүүгч Х.Идэрээс татгалзах хүсэлт гаргасан. Үүнийг тус дүүргийн ерөнхий шүүгч хянаад, захирамж гаргаж, хүсэлтийг хүлээн авах боломжгүй гэж шийдвэрлэсэн. Улмаар шүүгдэгч Ж.Эрдэнэбат тус дүүргийн бүх шүүгчээс татгалзсаныг бас хүлээн авахаас мөн татгалзсан. Мөн, улсын хоёр яллагчаас татгалзаж байгаагаа илэрхийлсэн. Үүнийг мөн хүлээн авахаас татгалзсан. Шүүх хуралдаан одоо үргэлжилж байна гэв. 

Тодруулж хэлбэл, шүүгдэгч Ж.Эрдэнэбат өмгөөлөгчгүй, шүүгдэгч Б.Отгонбаатарын биеийн байдал муу байдалтайгаар шүүх хуралдаан энэ мөчид явагдаж байна. 

---