Бүгд Найрамдах Беларусь Улсын Ерөнхийлөгч Александр Лукашенко төрийн шагнал гардуулах ёслолын үеэр тус улс коронавирусийн цар тахлыг ялсан болохыг мэдэгджээ.

Ингэхдээ Лукашенко халдварын эсрэг тэмцэлд тэргүүн эгнээнд хүчин зүтгэсэн эмч нарын оруулсан хувь нэмрийг онцолсон байна. Төрийн тэргүүн Беларусь улс “улс төрийн ухаан” гаргаж, ард иргэд нь мэргэн оюунаа харуулсан. Манай улсын эрүүл мэндийн тогтолцоо аюулт цар тахлыг даваад гарсан хэмээн мэдэгджээ.

Ерөнхийлөгч Лукашенко “Хэдий бид тэмцлийн түвшинг бууруулахгүй ч би өнөөдөр бид ялсан гэдгийг хэлж чадна. Ковид-19-ийг бүрмөсөн ялсныхаа дараа бид одоо ч албан үүргээ гүйцэтгэж байгаа эмч нартайгаа уулзах болно” гэжээ.

Беларусь улсад коронавирусийн халдварын 62,424 тохиолдол бүртгэгдэн, 398 хүн нас барсан юм.

Эх сурвалж: Риа Новости

---