ОХУ-ын нийслэл Москвагийн Шереметьево нисэх онгоцны буудалд хоёр хүүхдээ орхисон Комсомольск-на-Амуре хотын оршин суугч Виктор Гавриловын эрүүгийн хэргийн мөрдөн шалгах ажиллагаа дуусжээ.

Энэхүү эрэгтэй энэ оны нэгдүгээр сарын сүүлчээр Хабаровск хотоос ирэхдээ зургаа ба есөн настай хоёр хүүгээ Шереметьево онгоцны буудал дээр үлдээсэн байсан бөгөөд хөвгүүдийн үүргэвчинд тэдний бичиг баримт, өөрийнх нь паспортын хуулбар болон зурвас байсан гэнэ. Виктор Гаврилов уг зурвас дээр мөнгөгүй болсон тул хүүхдүүдийг нь асрамжийн газарт хүргэхийн хүсээд, дараа нь заавал ирж авна гэж бичсэн байв.

Мөрдөн байцаалтаар Гаврилов хүүхдүүдээ хаяад зогсохгүй Комсомольск-на-Амур хотод байхдаа цахим банкны аппликейшн ашиглан нэгэн танил эмэгтэйгээсээ 100 мянган рубль хулгайлсан болох нь тогтоогдсон байна. Түүнийг хулгайн хэрэг болон хүүхдүүдээ аюулд оруулсан хэрэгт тус тус хариуцлага хүлээлгэхээр болоод байна. “Мөрдөн байцаалтын баг эрүүгийн хэргийн мөрдөн байцаалтыг эцэслэх хангалттай нотлох баримт цуглуулсан бөгөөд удахгүй яллах дүгнэлтийг баталгаажуулан, хэргийг шүүхэд шилжүүлнэ” хэмээн албаныхан мэдэгдэв.

Харин хөвгүүд одоо ээжтэйгээ хамт амьдарч байгаа ба мөрдөн байцаалтын явцад тэдэнд сэтгэлзүйн нарийн мэргэжлийн туслалцаа үзүүлсэн байна.

Эх сурвалж: Риа Новости

---