Монгол Улсын Засгийн газар, Улсын онцгой комиссын шийдвэрээр энэ сард нийт есөн удаагийн тусгай үүргийн нислэгээр эх орондоо ирэх хүсэлтэй иргэдээ татан авахаар болсон.

Энэ дагуу өнөөдөр БНСУ-аас хоёр удаагийн  тусгай үүргийн нислэгээр 420 иргэн эх орондоо ирнэ. Сөүл-Улаанбаатар чиглэлийн эхний онгоцоор 170  иргэн өнөөдөр 12:50 цагт ирэх байсан ч техникийн шалтгаанаар тус онгоц Бээжинд газардсан юм.

МИАТ компанийн зүгээс “ОМ302 дугаартай нислэгийн мэдээлэл МИАТ ТӨХК-ийн Сөүл-Улаанбаатар чиглэлийн ОМ302 дугаартай нислэг техникийн шалтгаанаар БНХАУ-ын Бээжин хотод 13:23 цагт техникийн буулт хийгээд байна. Тус нислэгийн 170 зорчигчийг БНХАУ-ын Бээжин хотоос авчрах агаарын хөлөг Улаанбаатар хотоос 14:00 цагт хөөрсөн. Урьдчилсан байдлаар онгоцны зорчигчид оройн 21.00 цаг орчимд “Буянт-Ухаа" олон улсын нисэх онгоцны буудалд газардах мэдээтэй байна. Онгоц газардах цаг өөрчлөгдөж магадгүй. Тусгай үүргийн онгоцны анхааруулах индикатор гэрэл ассан тул аюулгүй байдлыг хангах үүднээс Бээжин хотод түр буусан. Онгоц 4-5 хоногийн дараа эх орондоо ирнэ. Тусгай үүргийн онгоц Бээжинд саатсаны улмаас долдугаар сард хийх тусгай үүргийн онгоцны нислэгийн хуваарьт өөрчлөлт орохгүй” гэдгийг хэвлэлийн төлөөлөгч Н.Ариунзаяа мэдээллээ. 

---