Пакистан улсын Карачи хотын хөрөнгийн бирж дээр буугаар зэвсэглэсэн этгээдүүд халдлага үйлджээ. Халдлагын улмаас багадаа хоёр хүн буудуулж амиа алдсан ба бусад иргэд гэмтэж шархадсан байна.

Зэвсэгтэй этгээдүүд хөрөнгийн биржийн төв хаалгыг гар бөмбөгөөр дэлбэлж, дотогшоо дайрч оржээ. Цагдаа нар ирж халдлага үйлдсэн зэвсэгтэй дөрвөн хүнийг буудаж хороосон ба барилгыг бүхэлд нь нэгжиж самнасан байна.

Одоогоор халдлагыг хаанаас зохион байгуулсан болон аль зэвсэгт бүлэг хамааралтайг тогтоож чадаагүй байна. Пакистаны хөрөнгийн биржээс нөхцөл байдал одоог хүртэл тодорхойгүй гэсэн тайлбарыг өгчээ.

Хөрөнгийн биржийн захирал Абид Али Хабибын хэлснээр буутай этгээдүүд автомашины зогсоолоос эхэлж таарсан хүн бүр лүү буудсан байна. Барилга дотор байсан ажилтан, үйлчлүүлэгчдийг арын хаалгаар зугтаалгажээ.

Эх сурвалж: ВВС

---