Монгол улсын Ерөнхийлөгч өнөөдөр 17 цаг 30 минутын үед Баянзүрх дүүргийн 48 дугаар сургуулийн санал авах байранд хүрэлцэн ирж саналаа өглөө. Тэрээр ийн оройтсоноо "Сонгуулийн ирц 17 цагийн байдлаар ямар байхыг харъя гэсэн. Залуучуудыг уриалахыг хүссэн. Ер нь заадаггүй байхаа" гэж тайлбарлалаа. 

Монгол улсын Ерөнхийлөгч Х.Баттулга: 

-Монгол улс УИХ-ын найм дахь сонгуулиа өнөөдөр өгч байна. 1990 онд ардчилсан хувьсгал хийснээ дэлхийд зарласнаас хойш 30 гаруй жил болж байна. Энэ хугацаанд алдаж, онож, олон замыг туулсан. Иймд сонгогчдодоо, тэр дундаа залуучуудыг саналаа идэвхийлэн өгөөрэй гэж хүсье.

17 цагийн байдлаар орон даяар сонгуулийн ирц 40 гаруй хувьтай байна. Харин Улаанбаатар хотын хувьд арай илүү 50 хувьтай байна гэсэн мэдээ авсан. 22 цагт санал хураалт дуусна. Та нарын санал энэ улс эх оронд чухал шүү гэж залуучууддаа хэлэх гэсэн юм.

Хүнсний бүтээгдэхүүн авахдаа хаана үйлдвэрлэсэн, гарал үүсэл, хугацаа нь дууссан эсэхийг маш сайн харж авдаг. УИХ-ыг бага ард түмэн гэж хэлдэг. Энэ 76-гаа бараа сонгодгоос илүү сайн цэнзуртэй сонгож гаргаарай гэж та бүхнээс хүсье.

Санал худалдаж авах тухай олон тойрог дээр яригдаж байна. Энэ бол үе үеийн сонгуульд яригддаг. УИХ-д уул уурхайн бизнес эрхэлдэг асар олон хүн орж ирдэг. Энэ хүмүүс санал худалдаж авах, гэмт хэрэг хийгээд УИХ-д орж ирж толгой хоргодох байдал сүүлийн үед ажиглагдаж байгааг ард түмэндээ дахин дахин хэлэх гэсэн юм.

-Ерөнхийлөгчийн зарлигаар нэр дэвшигч Г.Амартүвшинг Монгол улсын харьяатаас гарсан гэх тухайд?

-2014 онд Монгол улсын харьяатаас гарсан эсэхийг би мэдэхгүй. Архиваас судалж гаргаж ирэх ёстой байх. 

-Нэр дэвшигчдийг цагдан хорьсон үйл явдлуудыг ажиглаж байгаа юу?

-2013-2016 онд холбогдон, шүүхийн ялын дүгнэлт авсан хүмүүс байгаа бид ажиглаж байгаа. 

Дэлхий даяар цар тахалтай байна. Эдийн засаг төрөлжөөгүйгээс эдийн засгийг босгох, ядуурлаас гаргах дээр шуурхайлан ажиллана. Би өөрөө бизнесийн салбарт байсан хүн. 

---