Монгол Улсын Засгийн газраас АНУ-д хандивласан 1 сая ам.долларын үнэ бүхий 60 мянган ширхэг “PPE” буюу хамгаалалтын хувцас хэрэгслийг Америкийн тал энэ сарын 21-нд хүлээн авсан талаар Сиатлийн “KIRO 7 News” агентлаг мэдээлжээ.

Уг тусламжийг зөөвөрлөн ирсэн МИАТ-ийн тусгай үүргийн нисэх онгоц газардахад Монгол Улсаас АНУ-д суугаа Онц бөгөөд Бүрэн эрхт Элчин сайд Ё.Отгонбаяр болон тус улсын Онцгой байдлын Холбооны албаны аравдугаар бүс нутгийн дарга Майкл О'Хэйр нар биечлэн уулзаж, тусламжийн илгээмжийг албан ёсоор хүлээн авсан байна.

Элчин сайд Ё.Отгонбаяр энэхүү нислэгийг Монгол Улсын Засгийн газраас АНУ-ын Засгийн газар болон ард иргэдийн коронавирусийн эсрэг хийж буй тэмцэлд нь дэм болох зориулалттай 60 мянган хамгаалалтын хувцсыг тээвэрлэж ирж буйгаараа их чухал ач холбогдолтой болохыг онцолжээ. Түүнээс эдгээр хамгаалалтын хувцасны дээжийг гардан авсан Майкл О'Хэйр талархал илэрхийлэн, уг тусламжийг цар тахлын улмаас хүнд цохилт авсан Аризона, Невада мужийн Навахо үндэстнүүдэд хандивлахаа амлав.

Түүнчлэн тус мэдээн дээр Монгол Улсын коронавирусийг хяналтдаа авсан амжилтын талаар дурдан, зөвхөн гадаадаас зөөвөрлөгдөж ирсэн халдварын тохиолдлууд бүртгэгдээд байгааг тэмдэглэлээ. Энэ талаар ноён Ё.Отгонбаяр “Бид COVID-19-ийг хяналтаасаа гаргахгүй байж чадсаар байгаа бөгөөд АНУ болон дэлхий даяарх бүх найзууддаа туслахыг зорьж байна” гэсэн юм.

Эх сурвалж: KIRO 7 News

---