Умард Солонгосын төрийн мэдлийн телевизээр Өмнөд Солонгос руу хийх гэж байсан цэрэг, зэвсгийн дайралтаа түр азналаа хэмээн мэдэгджээ. Уг шийдвэр нь удирдагч Ким Жон Уны даргалсан уулзалтын үр дүн хэмээжээ.

Илт дайсагнасан харилцаатай байсан Өмнөд ба Умард Солонгосын харилцаа 2018 онд хийсэн түүхэн уулзалтаас хойш намжмал байдалтай байсан ч ойрын долоо хоногуудад Умардын эсрэг суртал ухуулагчдаас болж хурцадмал байдалд шилжээд байгаа юм.

Өмнөд Солонгосын Засгийн газар Умардын хилийн дагуу суртал ухуулга илгээгчдийн үйл ажиллагааг хорьсон боловч тэд үргэлжлүүлэн агаарын бөмбөлөг хөөргөсөөр байсан нь Умардын эрх баригчдын ундууцлыг төрүүлсэн. Удирдагч Ким Жон Уны дүү Ким Ё Жон Өмнөд Солонгосын Засгийн газрыг 2018 онд байгуулсан гэрээ хэлэлцээрийг зөрчсөн гэж үзэн дундын холбоо харилцааны газрыг дэлбэлж устгасан билээ. Мөн хоёр улсын дундах зэвсэггүйжүүлсэн бүсэд цэрэглэн нэвтэрнэ хэмээн анхааруулсан юм.

Тэгвэл ах Ким Жон Ун Цэргийн төв хороотой хуралдаж цэргийн ажиллагааг түр зогсоох шийдвэр гаргажээ.

Эх сурвалж: ВВС

---