Эрүүл мэндийн яамны ээлжит 11 цагийн мэдээлэл боллоо. 

ХӨСҮТ-ийн ерөнхий захирал Д.Нямхүү:

-ХӨСҮТ-өөс зургадугаар сарын 23-ны өдөр нийт 249 хүнд коронавирусийн шинжилгээ хийхэд бүгд сөрөг гарч коронавирус илрээгүй.

Дахин арван хүн эдгэрч дараагийн шатны сувилал руу шилжсэн сайн мэдээтэй байна. Эдгэрсэн 10 хүн бүгд оюутнууд бөгөөд 19-35 настай 28-41 хоног эмчлэгдэн гарлаа.
Монгол улсад 215 тохиолдол албан ёсоор бүртгэгдсэнээс нийт 168 хүн эмнэлгээс гарч, дараагийн сувилал руу шилжээд байна.

Одоогоор 47 хүн эмчлэгдэж байгаа бол биеийн байдал хүндэвтэр зургаа, хөнгөн 41 хүн байгаа юм. ХӨСҮТ-д одоогоор 94 хүн эмчилгээ, ажиглалт, тандалтад байна.
Сиатл-Улаанбаатар чиглэлийн нислэгээр ирсэн иргэдийг тусгаарлах байруудад хуваарилан сорьц цуглуулах ажил эхлээд явж байна. 

---