ХБНГУ-ын Штутгат хотын төв хэсэгт шөнийн цагаар гарсан үймээн самууны үеэр хэд хэдэн бүлэг хүмүүс дэлгүүрүүдийн цонх хагалж, дээрэмдэн, цагдаагийн машин руу дайрчээ. Германы баруун өмнөд хэсэгт гарсан уг хэргийн улмаас 19 цагдаагийн ажилтан шархдаж, 12 цагдаагийн машинд гэмтэл учирсан гэж  мэдэгдэв.

Албаныхан 17 настай иргэнийг хар тамхины хэрэгт сэжиглэн, байцаасны дараа дээрх нөхцөл байдал үүссэн болохыг хотын Цагдаагийн газрын дэд ерөнхийлөгч Томас Бергер сэтгүүлчдэд хэлжээ. Хотын төвийн Шлоссплацын талбайд 100-200 хүн цуглан, цагдаа нар луу чулуу, шил шидэж эхэлсэн гэнэ. Удалгүй энэ тоо өсч, 400-500 хүн цагдаа нар луу дайрсан байна. Үймээн самуун дэгдээгчдийн ихэнх нь юүдэн өмсөж, нүүрээ халхалсан байжээ.

Цагдаагийн ерөнхийлөгч Фрэнк Лутцийн хэлснээр сүүлийн 3-4 долоо хоногийн хугацаанд хотын нөхцөл байдал бага багаар хурцдаж байсан аж. Штутгат хотын зарим иргэд хэсэг хугацааны турш олон нийтийн газар архидан согтуурч, нийгмийн цахим сүлжээгээр цагдаа нарын талаар түрэмгий, доромжлолын өнгө аясыг ихээр илэрхийлэх болжээ.

Үймээн дэгдээгчид гар утас, үнэт эдлэлийн дэлгүүр зэргийг дээрэмдэн, түргэн хоолны газруудыг ч сүйтгэсэн байна. Тэд нийтдээ 40 дэлгүүр сүйтгэж, есөн аж ахуй нэгж газрыг дээрэмджээ.

Нөхцөл байдлыг хяналтад оруулахын тулд 200 гаруй нэмэлт цагдаа хотын төвд очин ажиллаж, үүр цайхад үймээн самуун намжсан аж. Гал сөнөөгчид болон иргэний хамгаалалтын сайн дурынхан эвдэрсэн дэлгүүрүүдийг засаж эхэлжээ. Одоогийн байдлаар цагдаа нар 24 хүнийг баривчлаад байгаагаас 12 герман, 12 нь Германы иргэд биш гэж тодорхойлогдоод байна.

Эх сурвалж: BBC

---