Монгол дуучин Н.Идэрмөнхийн өрсөлдөн, тавдугаар дугаарын ялагч буюу “Хаан” болж байсан БНСУ-ын “Е” сувгийн “Topgoal Rhapsody” дууны тэмцээний наймдугаар дугаар өнгөрөгч бямба гарагт болж өнгөрлөө. Энэ удаагийн дугаарт долоо дахь “Хаан” болохоор өрсөлдсөн зургаан гадаад оролцогчийн дунд өөр нэгэн монгол дуучин, Э.Энхбаяр байлаа.

Солонгост ирээд жил гаруй л болж байгаа түүний үзүүлбэр хамгийн эхэнд гарав. Тэрээр тус улсын алдарт дуучин Ким Гон Мугийн “Сөүлийн сар” хэмээх дууг солонгос болон эх хэл дээрээ дуулж, танилцууллаа. Э.Энхбаяр энэ дууг сонгох болсон шалтгаанаа тайлбарлан “Солонгост анх ирээд таньдаг хүнгүй, ээжийгээ санаж, найз охиноо харахыг хүссэн үедээ энэ дууг их дуулдаг байсан. Миний дотно найз мэт болсон дуу байгаа юм” гэжээ.

Түүнчлэн тэрээр өөд болсон аавынхаа төлөө Солонгос улсад ирж, дуучин болохоор шийдсэнээ дэлгэсэн юм. Энэ талаар тэрээр “Аав маань намайг жоохон байхаас л надад байнга дуу дуулж өгдөг байсан. Ингээд би багаасаа дуучин болохыг мөрөөдөх болсон. “Солонгост чи төрсөн нутгаасаа илүү сайн дуучин болж чадна” гэсэн аавынхаа хүслийн дагуу Солонгос улсад ирсэн. Хэдий аав маань намайг тайзан дээр байхыг нэг ч удаа харж байгаагүй ч өнөөдөр миний үзүүлбэрийг тэнгэрээс үзэх байх аа. Надад “Сайн байлаа, их хичээсэн шүү” гэж хэлэх байсан байх” хэмээн өгүүлсэн байна.

Харин түүний чадварлаг үзүүлбэрийг шимтэн сонссон шүүгчид гайхаж биширснээ илэрхийлэн, тэмцээний эхнээс ширүүн өрсөлдөгч гарч ирлээ хэмээн Э.Энхбаярыг магтав. Шүүгчдийн нэг “Үнэнийг хэлэхэд энэ дууг Ким Гон Му өөрөө ч дуулахад хэцүү гэдэг хэдий ч Энхбаярын дуулахыг сонсоод энэ дуу ийм амархан билүү гэж бодогдлоо. Сонсоход таатай байлаа” гэсэн бол өөр нэгэн гадаад шүүгч “Солонгост ирээд жил гаруйхан болоод, солонгос хэлийг зургаахан сар сураад ийм тайзан дээр гарч, ийм үзүүлбэр үзүүлнэ гэдэг бол гайхалтай хэрэг. Тайзан дээр байх төрөлхийн авьяастай гэж бодож байна” хэмээн дээгүүр үнэлсэн юм.

Эцэст нь Э.Энхбаяр 926 оноо аван, түүний дараа дуулсан хятад оролцогчийг ялаад байсан ч, харамсалтай нь гурав дахь дуучинд оноогоороо дийлдэн, тэмцээнийг орхих болсон юм. Тэрээр “Өдийг хүртэл тусалж, дэмжсэн хүмүүст баярлалаа. Цаашид дуучин болохоор хичээх болно” гэсэн үгээр уг тэмцээн дэх аяллаа өндөрлөлөө. 

---