Япон улсын Хууль зүйн сайд асан Кацуюки Каваи өөрийн эхнэр хууль тогтоогч Анригийн өнгөрсөн жилийн дээд танхимын сонгуулийн кампанит ажлын үеэр орон нутгийн улс төрч, дэмжигчдэд бэлэн мөнгө өгсөн гэж сэжиглэгдэн, гэр бүлээрээ баривчлагджээ.

Төлөөлөгчдийн танхимын гишүүн 57 настай Кацуюки болон түүний 46 настай эхнэр Анри нар өнгөрсөн жилийн долдугаар сард болсон Зөвлөхүүдийн танхимын сонгуульд санал худалдаж авсан гэж сэжиглэгдэж байна. Уг сонгуулийн үр дүнгээр Анри Каваи суудал авч чадсан юм.

Кацуюки 24 сая иен буюу 632 сая төгрөгийн бэлэн мөнгө тараасан бол эхнэр нь 1.5 сая иен буюу 39 сая гаруй төгрөгийг тараажээ. Тэд нийт 100 орчим хүнд бэлэн мөнгө өгсөн гэнэ. Эдгээр 100 хүний ихэнх нь прокурорын байцаалтын үеэр бэлэн мөнгө авснаа хүлээн зөвшөөрсөн гэж эх сурвалж мэдээлсэн байна. Түүнчлэн прокурорууд Кацуюки Каваи эхнэрийнхээ өмнөөс энэхүү үйл ажиллагааг зохион байгуулсан болохыг олж тогтоожээ.

Хэд хэдэн удаагийн сайн дурын байцаалтын үеэр хос санал худалдаж авсан гэдгээ эрс няцаасан. Лхагва гарагт Кацуюки сэтгүүлчдэд өгсөн ярилцлагынхаа үеэр холбогдох бүх талуудад асуудал үүсгэсэндээ уучлал гуйжээ. Гэвч тэрээр түүний улс төрийн үйл ажиллагаа хэзээ ч хууль зөрчөөгүй гэж мэдэгдсэн юм. Харин Анри Каваи өмгөөлөгчийнхөө зөвлөгөөгөөр мэдэгдэл өгөхөөс татгалзав.

Кацуюки өмнө нь Ерөнхий сайд Шинзо Абэгийн гадаад харилцааны асуудал эрхэлсэн тусгай зөвлөхөөр ажиллаж байсан бөгөөд энэхүү хэрэг Абэ болон түүний Засгийн газарт хүнд цохилт болж байгаа нь тодорхой билээ.

Эх сурвалж: Japan Today

---