Францын түүхэн дурсгалт төдийгүй дарсны өлгий нутаг болсон Бургунди мужийн нийслэл Дижон хотод дөрөв хоногийн турш зэвсэглэсэн мөргөлдөөн газар аваад байна. Цагдаа нарын мэдээлж буйгаар үймээн самуун төдийлөн гараад байдаггүй харьцангуй тайван хотод 16 настай Чечень хүү рүү дайрч доромжилсны хариуд өш хонзон санаж Чечень гаралтай иргэд, нийгэмлэг эсэргүүцэл үзүүлжээ.

Засгийн газрын эрх баригчид Дижон хотод үймээн самууныг намдааж, эсэргүүцлийн хөдөлгөөнөө зогсоохыг уриалж байна. Зарим албан бус эх сурвалжууд Францын өнцөг булан бүрт амьдардаг төдийгүй Бельги, Герман улсуудаас ч чеченьчүүд ирж Дижон хотын эсэргүүцлийн мөргөлдөөнд нэгдсэн тухай мэдээлжээ. Хотын ядуусын хороолол байдаг Гресиллес дүүрэгт эсэргүүцэгчид цугласан байна.

Даваа гарагийн үдэш юүдэнтэй зэвсэг барьсан этгээдүүд тус дүүрэгт цуглаж агаарт хий буудан, гудамжин дахь хяналтын камеруудыг буудаж, хогийн сав тээврийн хэрэгслүүдийг шатаажээ. Хэв журам сахиулах цагдаа нар сөргөлдөгчдийг дарахын тулд цаг хагасын турш тэмцэж, дөрвөн хүнийг баривчилсан байна.

Дотоод хэргийн дэд сайд Лорен Нунез Дижон хотод ирж нөхцөл байдлыг хурцаар шүүмжлэн танхай этгээдүүдэд хариуцлага тооцохыг мэдэгдэж хагас цэрэгжүүлсэн цагдаагийн албаны 150 гаруй ажилтныг  мягмар гарагийн орой тараан байршуулжээ.

Эх сурвалж: The Guardian

---