БНАСАУ өнөөдөр хоёр Солонгосын хил дээр байдаг Кэсонг хот дахь харилцаа холбооны газрыг дэлбэлжээ.

БНСУ-ын Нэгтгэлийн яамнаас хойд хөрш нь харилцаа холбооны албыг өнөөдөр 14:49 цагт дэлбэлсэн болохыг мэдэгдэв. Цэргийн эх сурвалжууд Кэсонг хотоос дэлбэрэлт сонсогдож, утаа харагдсан хэмээн мэдүүлсэн байна.

Энэхүү дэлбэрэлтээс өмнө Умард Солонгосын удирдагч Ким Жон Уны охин дүү Ким Ё Жон “Удалгүй Умард-Өмнөдийн хамтарсан ямар ч хэрэгцээгүй харилцаа холбооны газар юу ч үгүй нуран унасан дүр зураг харагдах болно” хэмээх мэдэгдлийг өнгөрөгч бямба гарагт хийгээд байсан юм.

Өмнөд Солонгосын эсэргүүцэгчид Умард Солонгосын эсрэг ухуулах хуудас бүхий бөмбөлгийг хөөргөсөнд Ким Ё Жон ихэд бухимдан, хариу үйлдэл үзүүлэхээ сануулсаар байсан билээ. Өнөөдрийн дэлбэрэлтийн улмаас хоёр улсын зөрчилдөөн улам хурцадмал байдалд ороод байна.

Эх сурвалж: Yonhap News Agency

---