Шинэ Зеланд улс коронавирусийн халдварыг ялан дийлсэн улс гэдгээ зарлаад 24 хоног өнгөрчээ. Тэгвэл Их Британиас ирсэн хоёр иргэнээс коронавирусийн халдвар илэрснийг мэдээлсэн байна.

Коронавирусгүй улс болсон гэдгээ зарласнаас хойш Шинэ Зеланд өнгөрсөн долоо хоногт дотоодын хорио цээрийг бүхэлд нь цуцалсан юм. Гэсэн ч хилийн хяналтыг хэвээр нь үлдээж, зөвхөн иргэдээ болон тусгай үүргийн ажилтнуудыг нэвтрүүлэхээр болсон.

Шинэ Зеландад ирж байгаа бүх хүмүүсийг коронавирусийн шинжилгээнд хамруулж, 14 хоногийн хугацаанд тусгаарлах, хөл хорионд оруулахаар шийдсэн юм. Ийнхүү гаднаас зөөвөрлөгдөн ирсэн халдварын хоёр тохиолдол нэмэгдсэнээр нийт 1,506 хүн халдвар авч, 22 иргэн нас бараад байна.

Дотоодын хорио цээрийг цуцалснаар нийтээс зай барих шаардлагагүй, олон нийтийн цугларалтыг хорихгүй. Тус улс богино хугацаанд халдваргүй улс болсон нь хилээ эрт хааж, улс даяар хөл хорио тогтоосны үр дүн хэмээн тайлбарлаж байгаа юм.

Эх сурвалж: ВВС

---