Филиппин улсад хэвлэлийн эрх чөлөө ямар түвшинд байгааг харуулсан үйл явдал боллоо хэмээн олон улсын хэвлэл мэдээллийн хэрэгслүүдээр зарлаж байна.

Сэтгүүлч Мариа Рессаг цахим орчинд гүтгэлэг явуулсан гэм буруутай хэмээн шүүхээс мэдэгджээ. Тэрээр энэ шийдвэрийг илт улс төржсөн шийдвэр хэмээн буруутгаж байна. Мөн уг хэрэгт Rappler цахим хуудасны бичээч байсан хүнийг буруутгаж яллажээ. Тэднийг батлан даалтад сулласан байсан ч зургаан жилийн хорих ял сонсгосон байна.

Филиппин улсын Ерөнхийлөгч Родриго Дутерте уг шийдвэрийн цаана байгаа гэж хэвлэлийнхэн сэжиглэж байгаа юм. Харин Ерөнхийлөгч болоод түүнийг дэмжигчдийн зүгээс хатагтай Мариа Ресса болон түүний мэдээллийн сайт хуурамч мэдээ тараасан гэж буруутгаж байна.

Тус улсад сэтгүүлзүйн салбарын ажилтнууд айдас, дарамтанд байдгийн хамгийн том жишээ нь хатагтай Рессагийн хэргийг шийдсэн байдлаас харагдаж байна хэмээн дотоодын болоод гадаадын эх сурвалжууд дамжууллаа.

Сэтгүүлч Ресса болон хамтрагчид нь хорих ял оноосон хэрэг найман жилийн өмнөөс эхтэй ажээ. 2012 онд Rappler сайтад бизнес эрхлэгч Вилфредо Кенгийн өмнөх шүүгчтэй холбоотой мэдээллийг нийтэлснээс дөрвөн сарын дараа прокурорууд хэргийг шалгаж эхэлсэн байна. Ингэхдээ цахим гүтгэлэг үйлдсэн хэмээн буруутгажээ.

Марио Ресса нь Филиппин улсад төрсөн ч АНУ-д өсч, 1980-аад оны үед Фердинанд Маркосын захиргаадалтын дэглэм нурсны дараа эх орондоо эргэн иржээ. Тэрээр CNN агентлагт сэтгүүлчээр ажиллаж байгаад Rappler сайтыг нээсэн байна. Уг сайт нь Дутертегийн алдаа дутагдлыг ил тодоор шүүмжилдэг орон нутгийн мэдээллийн хуудас юм. 2018 онд TIME сэтгүүл Рессаг оны онцлох хүнээр нэрлэжээ.

Эх сурвалж: ВВС

---