БНХАУ-ын нийслэл Бээжин хотын хүнс, жимсний нийлүүлэлтийн 90 хувийг хангадаг Шинь Фа Ди хүнсний бөөний захаар үйлчлүүлсэн 50 орчим насны хоёр эрэгтэйгээс коронавирус илэрсний дараа тус захыг битүүмжилж дотор нь байсан 10,000 хүнийг коронавирусийн шинжилгээнд хамруулж эхэлжээ. Тэдэнтэй ойр харьцсан 517 хүнд шинжилгээ хийхэд 45 хүнээс коронавирус илэрсэн байна. Гэвч эдгээр халдварлагчдын алинд нь ч шинж тэмдэг илрээгүй ажээ.

Захыг бүрэн хамгаалалтад авч битүүмжлэн, 24 цагийн турш цагдаа нар хамгаалж байна. Сүүлийн 55 хоногийн турш Хятадад орон нутгийн халдвар илрээгүй байсан бөгөөд шинээр нэмэгдсэн цөөн тохиолдлууд гаднаас зөөвөрлөгдөн ирсэн байсан юм.

Харин ийнхүү нийслэл хотод халдвар орон нутгийн шинжтэйгээр дахин тархаж, хоёр дахь давлагаа эхэлсэн байж болзошгүй тул эрх баригчид шуурхай арга хэмжээ авч хотод хэсэгчлэн хөл хорио тогтоогоод байна. Шинь Фа Ди захаас коронавирус илэрсэнтэй холбогдуулан тус зах байрладаг Бээжин хотын өмнөд Фентай дүүргийн хоёр сая оршин суугч, 11 орон сууцны хороолол, хэд хэдэн сургууль, ойролцоох захуудыг хорио цээрийн дэглэмд шилжүүллээ.

Тус захад ажилладаггүй ч үйлчлүүлсэн иргэдийг ч мөн эрх баригчид илрүүлэн шинжлэхээр ажиллаж байна. Дүүргийн нутаг дэвсгэрт бүхэлд нь дайны онц байдал зарлажээ. Хөл хорио тогтоож үйл ажиллагааг нь зогсоосон нутаг дэвсгэрт цэргийн олон зуун албан хаагчийг дайчлан нэвтрүүлсэн байна.

Нийслэл хотын хэмжээнд эрсдэлээс урьдчилан сэргийлж спортын арга хэмжээ, олон нийтийн цуглааныг дахин хорилоо.

Эх сурвалж: BBC, The Guardian

---