УОК-ын 23 дахь хуралдаан өнөөдөр 08 цагаас хуралдаж, 12 цагт дууслаа. Хуралдаанаар таван асуудал хэлэлцэж, тодорхой шийдвэрүүд гарсан талаар УОК-ын дарга, Шадар сайд Ө.Энхтүвшин болон тус комиссын гишүүд мэдээлэл хийлээ. 

Монгол улсад коронавирусийн 194 тохиолдол өнөөдрийн байдлаар бүртгэгдээд байгаа. Эдгээрийн 89 хувь нь ОХУ-аас, үлдсэн 11 хувь нь есөн улсаас зөөвөрлөгдөн орж иржээ. 

Өнгөрсөн хугацаанд 17 400 орчим иргэнийг шинжилгээнд хамруулсан. Лабораториудад 27, ХӨСҮТ болон бусад  тусгаарлах байруудад 200 эмч, ажилтан ээлжээр ажиллаж байна. ХӨСҮТ-ийн дарга Д.Нямхүү мэдээлэл хийж, N95 маркийн амны хаалтаас бусад хувцас хэрэглэл, эм тариа 30 хоногийн нөөцтэй байгаа гэжээ. Иймд УОК-оос шийдвэр гарч, шаардлагатай амны хаалтыг нийлүүлэхээр тогтжээ. Өглөө хөөрсөн Токио чиглэлийн онгоцоор нөөцийн эм, тариа ирж байгаа гэж УОК-ын дарга Ө.Энхтүвшин мэдээлэв. 

АНУ дахь монголчуудын байдал хүнд байгаа талаар олонтаа мэдээлсэн. Монгол улсын Засгийн газраас АНУ-д 1 сая ам.доллартай тэнцэх хамгаалах хувцас хэрэгсэл хандивлаж байгаа. Энэхүү хандивыг энэ сарын 21-нд тусгай үүргийн онгоцоор хүргэж, Сиеттл хотоос 260 орчим монгол иргэнээ авчирна. 

Мөн БНЭУ-ын Гова гэж газраас 246 ламхайг татан авчрахаар болжээ. Замаараа Лаосоор дайрч, Монгол улсын арван иргэнийг авчирна. Гова нь Шинэ Делигээс 2500км алсад байдаг тул өмнөх нислэгт эдгээр хүүхдүүдийг багтааж чадаагүй учир хамгийн боломжит ойрхноор нь Говаг сонгожээ. 

Сөүлээр транзит нислэг хийнэ. ХБНГУ-ын Франкфуртаас иргэдээ татна гээд энэ сардаа есөн тусгай үүргийн нислэг үйлдэж, Монгол улсын 2300 иргэнээ эх орондоо авчрахаар ажиллаж байгаа аж. 

Цар тахалтай нүүр тулан ажиллаж байгаа төрийн тусгай албан хаагчдад зориулсан Түрээслээд, өмчлөх орон сууцны хөтөлбөрийн талаар УОК дээр хэлэлцжээ. Төрийн албан хаагчдыг 1500 орчим орон сууцаар хангана гэж тооцож байгаа. Энэ хөтөлбөрийг гардан хэрэгжүүлэгч нь НОСК байх юм. 

Урьдчилгаа болон сар бүрийн төлөлт дээр уян хатан хандана. Барилгын цахим үзэсгэлэнг зохион байгуулж, мкв нь хамгийн бага, 100 хувь ашиглалтад орсон, чанарын өндөр түвшинд баригдсан орон сууцыг төрийн тусгай албан хаагчдад санал болгоно. Онцгой, цагдаа, хил хамгаалах, тагнуул, гааль, ус сувгийн албан хаагчид энэхүү хөтөлбөрт хамрагдах ба эрүүл мэндийн салбарын ажилтнуудад илүүтэй анхаарна гэв. Хэд хоногийн өмнө ХӨСҮТ-д ажилладаг арван албан хаагчид батламжийг нь гардуулжээ. 

Төгсгөлд нь, УОК-ын захирамжийг нэр дэвшигчид биелүүлэхгүй байгаатай холбогдуулан мэдэгдэл гаргаснаа УОК-ын дарга Ө.Энхтүвшин танилцууллаа. Хэт олон хүн бөөгнөрүүлэхгүй байх, амны хаалт, бээлийтэй уулзаж байхыг санууллаа. Сануулгыг үл ойшоовол Зөрчлийн хууль болон бусад хуулиар хатуу хариуцлага хүлээлгэнэ гэдгээ мэдэгдэв.

---