Бэлэн хувцасны алдарт ZARA брэндийн ашиг орлого коронавирусийн тархалтын үеэр 44 хувиар буурсантай холбогдуулан дэлхий даяар үйл ажиллагаа явуулдаг 1,200 дэлгүүрээ хаахаар болжээ. Бэлэн хувцас худалдаалдаг дэлгүүрүүдээ буулган оронд нь цахим худалдааг үйлчлүүлэгч, хэрэглэгчдэдээ санал болгож байна.

Хаахаар шийдвэрлэсэн 1,200 дэлгүүрийн ихэнх нь алдагдал их хүлээсэн жижиг салбарууд байгаа ажээ. ZARA брэндийг эзэмшдэг Inditex компанийн хэлснээр бусад Bershka, Pull&Bear, Massimo Dutti брэндүүдийн борлуулалт ч мөн буурсан байна.

Ихэвчлэн Ази болон Европ дахь салбаруудаа хаахаар төлөвлөсөн ч ажилчдын тоонд өөрчлөлт орохгүй. Учир нь бэлэн хувцас худалдаалдаг байсан ажилчдыг цахим худалдааны сүлжээнд өөр орон тоо, ажил үүргийн хуваарьт шилжүүлэх юм байна. Дахин зохион байгуулалтын дараа 7,412 салбар дэлгүүр 6,700 болж буурахтай зэрэгцэн 450 салбар шинээр нээхээр төлөвлөжээ.

Албан ёсны мэдээгээр Inditex компанийн борлуулалт хоёрдугаар сарын 1-ээс дөрөвдүгээр сарын 30-ны өдрийн хооронд 44 хувь буюу 3,3 тэрбум евро хүртэл буурсан үзүүлэлттэй гарсан байна. Энэ жилийн хоёрдугаар улиралд 409 сая еврогийн цэвэр алдагдал хүлээжээ. Нийт салбар дэлгүүрийн ¼ нь энэ сарын 8-ны өдөр хүртэл хаалттай байжээ.

Бэлэн бараа худалдааны салбарт ашиг орлого буурсан ч цахим худалдаа жилийн өмнөхөөс 50 хувиар өссөн байна.

Эх сурвалж: The Guardian

---