Парис хотын алдарт Эйфелийн цамхаг коронавирусийн цар тахлын улмаас гурван сар гаруй хугацаагаар хаагдсан нь Дэлхийн 2-р дайнаас хойш хамгийн удаан хаагдаж байгаа тохиолдол юм. Тэгвэл энэхүү дурсгалын газар энэ сарын 25-нд эргэн нээгдэхээр болсныг мэдэгдлээ.

Цамхгийг үзэж сонирхохоор ирсэн хүмүүст хязгаарлалт тавих ба 11-ээс дээш насны бүх хүн амны хаалт зүүх шаардлагатай. Халдварын эрсдэлээс урьдчилан сэргийлэн, хүмүүсийн хоорондох аюулгүй зайг хангахын тулд “Эхний ээлжид зочид зөвхөн шатаар л гарах боломжтой, лифтийг ашиглахгүй” хэмээн цамхгийн албан ёсны вевсайтад тэмдэглэжээ.

Мөн цамхгийн эргэн тойрон дахь олон нийтийн талбайг өдөр тутам цэвэрлэн, халдваргүйжүүлэн, иргэд бие биеэсээ хэр хэмжээний зай барихыг заасан тэмдэглэгээг газар дээр тавьсан байна.

Парисын бусад алдартай үзвэр үйлчилгээнүүдийн нэг Версалын ордон энэ сарын 6-нд эргэн нээгдээд байгаа бол Луврын музей ирэх сарын 6-наас үүд хаалгаа нээх ажээ.

Эх сурвалж: Reuters, The Local fr

---