Эрүүл мэндийн яамны ээлжит мэдээллийн цаг эхэллээ. Монгол улсад коронавирусийн батлагдсан 194 тохиолдол бүртгэгдэж, өчигдрийн байдлаар 85 иргэн эдгэрээд байгаа билээ.

ДЭМБ-ын Америкийн бүсийг хариуцсан захирлын мэдээлснээр Өмнөд болон Хойд Америкт коронавирус огцом тархаж байгааг анхаарууллаа. Бразил, Мексик, Венесуэл зэрэг улсад хурдацтай тархаж байна. 

Манай хойд хөрш ОХУ өвчлөлийн тоогоор дэлхийд гуравдугаарт бичигдсэн хэвээр байна. Шинээр 8580 тохиолдол бүртгэгдэж, нийт 6142 хүн нас баржээ. 

Япон улсад 21 тохиолдол бүртгэгдсэнээс бүгд дотоодын халдвар байсан байна. Харин БНСУ-ын хувьд 50 шинэ тохиолдлын долоо нь гаднаас зөөвөрлөгджээ. 

ХӨСҮТ-ийн дарга Д.Нямхүү: 

-ХӨСҮТ-ийн хоёр лабораториор 258 иргэнийг шинжлэхэд коронавирус илрээгүй. Тандалтад байгаа 12 хүнийг шинжлэхэд вирус илрээгүй. Ажиглалтын байранд байгаа 11 иргэнд давтан шинжилгээ хийхэд коронавирус илрээгүй. Алтанбулагийн боомтоор орж ирсэн ачаа тээврийн 24 жолоочоос мөн вирус илрээгүй. Сэлэнгэд тусгаарлагдсан 14 иргэнээс давтан шинжилгээ авахад коронавирус илрээгүй. 

Сидней-Улаанбаатарын чиглэлийн тусгай үүргийн нислэгээр ирсэн нийт 274 хүнд шинжилгээ хийхэд вирус илрээгүй. 

Нэг сайхан мэдээ нь хоёр оюутан эдгэж, клиникээс сувилал руу шилжлээ. Ингээд эдгэсэн хүний тоо 87 боллоо. 

ХӨСҮТ-д хянагдаж байгаа 145 хүний 91 нь хөнгөн, 16 нь хүндэвтэр байна. 

Тува улс руу Увс аймгийн Давст сумаар гарсан хоёр хүний давтан шинжилгээг удахгүй хийнэ. Ард иргэддээ хандан хэлэхэд өөрийгөө хамгаална гэдэг эх орноо хамгаалж байгаа гэсэн үг шүү. 

---