Япон улсын Оита хотын цагдаа нар барилгын компанийн агуулахын хашаанд 53 настай хамт ажилладаг хүнийхээ дээрээс хоёр тонн барилгын материал унагасан сэрээт ачигч машины жолооч, 38 настай эрэгтэйг хүн амины хэрэгт сэжиглэн, баривчилжээ.

Цагдаагийн газрын мэдээлснээр уг хэрэг өнгөрөгч бямба гарагийн 09:00 цагийн орчимд гарсан байна. Сэжигтэн Хидэмицү Суэхиро тухайн үед сэрээт ачигч машин дээр хоёр тонн орчим хананы барилгын материал зөөж байсан бөгөөд үүнийгээ хохирогч Такаши Фужитагийн дээр унагасан гэнэ. Сэжигтэн дараа нь уг барилгын материалыг машиндаа буцааж ачаад, хэргийн газраас явжээ.

Такаши Фужита толгойдоо хүнд гэмтэл авсан бөгөөд ойролцоо өнгөрч явсан иргэн түүнийг хараад, түргэн дуудсан байна. Тэрээр эмнэлэгт хүргэгдсэн боловч удалгүй нас баржээ.

Албаны хүмүүсийн мэдээлснээр эдгээр хоёр эрэгтэйн хооронд урьд нь асуудал гарч байсан бөгөөд Суэхиро хэргээ хүлээгээд байгаа гэнэ.

Эх сурвалж: Japan Today

---