ОХУ-ын Оренбург мужийн Домбаровск дүүрэгт байшин нь нурах аюулд орсон гэр бүлээс дөрвөн хүүхдийг нь хүчээр салган авсан тус дүүргийн дарга Валерий Швиндт сайн дураар огцорсон талаар РИА Новости агентлагт мэдээллээ.

Үүнээс өмнө Оренбург мужийн Тюльпанный тосгоны байшингаас нэг эмэгтэйн дөрвөн бага насны хүүхдийг албаныхан хураан авч байгаа бичлэг хэвлэлээр цацагдаад байсан юм. Уг бичлэг дээр цагдаа нар эхлээд эмэгтэйг хүүхдүүдээ өгөхийг ятгаж байгаад, удалгүй хүүхдүүдийг нь хүчээр салган авч, эмэгтэйг гавласан байна. Цагдаагийн байгууллагаас эдгээр хүүхдүүдийг эмчилгээнд хамруулахаар авсан гэж мэдэгдсэн бөгөөд мөрдөн байцаах албаныхан уг гэр бүлийн байшинг ноцтой байдалд байгаа, хүүхдүүдийн амь нас, эрүүл мэндэд аюул учирч болзошгүй хэмээн тайлбарлаж байсан юм.

Оросын Хүний эрхийн асуудал эрхэлсэн комиссар Анна Кузнецова энэхүү арга хэмжээг арай хэтэрсэн гэж үзэн, асран хамгаалах байгууллагуудын ажлыг сайжруулан, үүнтэй ижил төстэй хэрэг дахин гарахаас сэргийлнэ гэж амлав. Харин Оренбург мужийн Засаг дарга Денис Паслер уг гэр бүлийн оршин суудаг газрын нөхцөл байдалд туслах тусгай ажилтан гарган өгч, хүүхдүүдийн эцгийг ажлын байртай болгоно гэж мэдэгджээ.

Удалгүй бүс нутгийн Насанд хүрээгүйчүүдийн асуудал эрхэлсэн комисс Домбаровск дүүргийн даргын гаргасан хүүхдүүдийг гэрээс нь хураан авах захирамжийг цуцалсан байна.

Эх сурвалж: Риа Новости

---