УИД-ийн түрээслэгчдийг даатгалын мэргэжилтэнтэй хамт дэлгүүрт 20, 20-оор нь оруулж, нөхцөл байдлыг танилцуулан, бараа бүтээгдэхүүнийг лацдуулах үйл ажиллагаа явуулж байна. Түрээслэгч нарын хувьд цүнхгүй орж байгаа бөгөөд дотроос ямар нэгэн зүйл гаргахгүй байгаа гэж “Номин холдинг” ХХК-ийн олон нийттэй харилцах албаны менежер Т.Оюунбилэг мэдээлэл өглөө. 

“Номин холдинг” ХХК-ийн олон нийттэй харилцах албаны менежер Т.Оюунбилэг: 

-2020 оны зургадугаар сарын 7-ны өдөр УИД-т галын аюул гарч харамсалтай үйл явдал тохиолдлоо. Нийслэлийн онцгой байдлаас 100 гаруй алба хаагчид шуурхай арга хэмжээ авч ажиллаж галыг өчигдөр 21.30 цагт бүрэн унтраасан. Галын улмаас хүний амь нас эрсдээгүй, эрүүл мэндээр хохирол учраагүй. Цаашид, манай компанийн зүгээс гал гарсан шалтгаан болон хохирлын үнэлгээг гаргахаар шуурхай ажиллаж байна.

Түрээслэгчид болон бараа ханган нийлүүлэгчидтэй “Номин Холдинг” компанийн борлуулагч салбараас тогтмол харилцаатай хамтран ажиллаж байгаа юм. Иймд харилцагч та бүхэн албан ёсны дүгнэлтийг гарах хүртэл хүлээцтэй хандаж бидэнтэй хамтран ажиллахыг хүсэж байна.

УИД нийт 4400 харилцагч, түрээслэгчтэй, 45 000 гаруй хувьцаа эзэмшигчтэй хамтран ажилладаг. Нэг давхраас эхлээд түрээслэгч нар бараа бүтээгдэхүүнээ бүртгэн авах үйл ажиллагаа явж байна” гэх мэдээллийг өглөө.

УИД-ын хохирол болон түрээслэгч нарыг нэвтрүүлэх үйл ажиллагаанд мэргэжлийн хяналтын 40 гаруй байцаагч, онцгой байдал, цагдаагийн 200 орчим бүрэлдэхүүн ажиллаж байгаа гэнэ.

Дэлгүүр дотор хяналт өндөр байгаа тул түрээслэгч нарыг санаа зовохгүй байхыг хүссэн юм. Өнөөдөр 1 болон 1.5 давхрын түрээслэгч нарыг оруулж, бараа материалыг бүртгэн, хайрцагт хийлгэн лацдах үйл ажиллагаа явагдах юм. Дараа нь мэргэжлийн хяналт болон цагдаагийн байгууллагаас тухайн түрээслэгч нарын бараа бүтээгдэхүүнийг шат дараатайгаар буцаан олгох үйл ажиллагаа хийгдэнэ гэнэ.

---