Саудын Араб улсад долдугаар сарын 28-ны өдөр дэлхийн шашны хамгийн том ёслолуудын нэг хаж мөргөл эхэлнэ. Тэгвэл мөргөлөөс цөөн хэдэн долоо хоногийн өмнө тус улсад коронавирусийн халдварын тохиолдол эрчтэй нэмэгдэж, 100,000 давлаа. Саудын Арабт коронавирусийн халдварын 101,914 тохиолдол албан ёсоор бүртгэгдэж, 712 хүн нас баржээ.

Дэлхий даяар коронавирусийн халдварын тохиолдол долоон сая давж, 406,000 иргэн нас бараад байна.

Энэ тоогоор Саудын Араб дэлхийд 16 дугаарт, Арабын хойгт тэргүүлж байгаа юм. Вант улсад хорио цээрийн дэглэмийг сулруулсны дараа хоёр дахь хоногтоо дараалан 24 цагийн дотор коронавирусийн 3,000-аас дээш тохиолдол бүртгэгдэж байгааг Эрүүл мэндийн яамнаас нь ням гарагт мэдээлжээ.

Тус улсад хаж мөргөлийн ёслолоос гадна ариун Мекка, Мэдинад исламын шашинтнууд ирж мөргөдөг заншлыг жилийн турш түр зогсоохоо анхааруулаад байгаа юм. Харин багадаа хоёр сая мөргөлч цугладаг хаж мөргөлийг энэ жил өнжих талаар эрх баригчид хараахан мэдэгдээгүй байна. Исламын шашинтай иргэд амьдралынхаа туршид ядаж нэг удаа ариун газрыг зорьж, хаж мөргөлд оролцох ёстой байдаг ажээ.

Энэ хооронд АНУ-д коронавирусийн  хоёр сая гаруй тохиолдол бүртгэгдэж, 112,000 иргэн нас барсан байна. Харин Бразил улсад халдварын 700,000 орчим тохиолдол бүртгэгдэж, 37,000 гаруй эндэгдэл гарчээ.

Эх сурвалж: The Guardian

---