Шинэ Зеланд улс коронавирусээр халдварласан өвчтөнүүдээ бүрэн эдгээсэн бөгөөд тус вирусийн идэвхтэй тохиолдол дахин оношлогдоогүй тул Ковид-19-өөс бүрэн ангижирсан гэдгээ албан ёсоор мэдэгдсэн байна. Тиймээс улс орон даяар тавьсан хорио цээрийн бүх дэглэмээ цуцална гэж Ерөнхий сайд Жакинда Ардернаас хүлээж байна.

Тус улсад хоёрдугаар сарын 28-ны өдөр Ковид-19-ийн анхны тохиолдол бүртгэгджээ. Сүүлийн 17 хоногийн турш шинэ тохиолдол илрээгүй ба халдвар авсан өвчтөнүүд бүрэн эдгэсэн байна. Ерөнхий сайд Ардерн удахгүй мэдэгдэл хийж энэ долоо хоногийн пүрэв гарагаас эхлэн бүх хорио цээрээ цуцална гэсэн мэдээллийг эх сурвалжууд өгч байна. Гэхдээ хилийн харуул хамгаалалт, хяналт хэвээр үлдэх ажээ.

Улсын хэмжээнд коронавирусийн халдварын 1,500 тохиолдол бүртгэгдэж, 22 иргэн нас барсан юм. Ерөнхий сайд гуравдугаар сарын 25-ны өдөр хөл хорио тогтоож, үүнээс хойш халдварын тохиолдол үр дүнтэйгээр буурсан билээ.

Хамгийн сүүлчийн өвчтөн 50 орчим насны эмэгтэй Оклэндэд эмчлэгдэн эдгэсэн тухай сайхан мэдээг Эрүүл мэндийн яамнаас шинэ долоо хоногийн эхэнд мэдээлжээ. Уг эмэгтэй 10 гаруй хоног эмчлэгдэн, сүүлийн 48 цагийн хугацаанд халдварын шинж тэмдэг илрээгүй тул тусгаарлалтаас гаргахаар болсон байна.

Эх сурвалж: The Guardian

---