Африк тивийн зүүн эрэг, Энэтхэгийн далайд байдаг Мадагаскар арлын улсын Боловсролын сайд сургуулийн хүүхдүүдэд зориулж хоёр сая ам.доллараар иштэй чихэр захихаар төлөвлөж байсан ч ажлаас нь халжээ. Болосвролын сайд асан Рижасоа Андриаманана коронавирусээс сэргийлэх ургамлын гаралтай эмийг хүүхдүүдэд уулгасны дараа аманд нь таагүй амт мэдрэгдэх тул хүүхэд бүрт гурван ширхэг иштэй чихэр өгч тэр амтыг дарахыг хүссэн байна.

Энэ төлөвлөгөөг сонссон Мадагаскарын Ерөнхийлөгч Андри Ражоелина тэр даруй болиулж, ажлаас нь чөлөөлжээ. Тэрээр коронавирусийн эмчилгээ, урьдчилан сэргийлэх үед Ковид-Органикс нэртэй ургамлын гаралтай бэлдмэлийг дэмжиж байгаа ч амтат чихрийг дэмжихээс татгалзсан байна.

Африкийн улс орнууд уг эмийг Ковид-19 вирустэй тэмцэхэд тустай гэдэгт итгэж их хэмжээгээр импортолсоор байгаа юм. Дэлхийн эрүүл мэндийн байгууллагын зүгээс Ковид-Органикс гэх эм нь өвчнийг анагааж байгаа гэдэг нь батлагдаагүй хэмээн сэрэмжлүүлжээ.

Мадагаскар улсын эрүүл мэндийн академиас ч мөн уг бэлдмэл нь иргэдийн эрүүл мэндэд сөрөг нөлөө үзүүлж болзошгүй гэдгийг анхааруулсан ч Ерөнхийлөгч шүүмжлэл, сэрэмжлүүлгийг үл хайхран хэрэглэхийг зөвлөөд байгаа юм. Тус улсад коронавирусийн халдварын 1,000 орчим тохиолдол бүртгэгдэж, долоон иргэн нас баржээ. Улс орон даяар хорио цээрийн дэглэм тогтоосон ч эмх замбараагүй байдал гарч цэргүүдийг тараан байршуулжээ.

Эх сурвалж: CNN

---