АНУ даяар арьс өнгөөр ялгаварлан гадуурхах үзлийг эсэргүүцэн, Жорж Флойдын үхлийн буруутанг шударгаар шийтгэхийг шаардсан жагсаал мөргөлдөөн газар авсан билээ. Тэгвэл эдгээр жагсаалуудын үеэр хэвлэл мэдээллийн олон арван ажилтныг чулуугаар цохих, хиймэл сумаар буудах зэргээр бэртээж гэмтээх үзэгдэл ихэссэн байна.

Нью-Йоркод төвтэй Сэтгүүлчдийг хамгаалах хорооноос уг явдлыг хурцаар шүүмжлэн буруутгаж, хүлээн зөвшөөрөх аргагүй явдал хэмээн мэдэгдлээ. Өнгөрсөн амралтын өдрүүдэд хэвлэл мэдээллийн багийнхан халдлагад өртсөн тухайгаа мэдээлсэн байна. АНУ-ын Хэвлэлийн эрх чөлөөний төрийн бус байгууллагаас хяналт тавьж сэтгүүлч, сурвалжлагчдын биед халдсан 100 гаруй тохиолдол бүртгэжээ.

Тухайлбал бямба гарагийн шөнө Миннеаполис хотод цагдаа нар жагсагчдыг тараах үеэр Reuters агентлагийн хоёр ч ажилтныг үрлэн сумтай буугаар бэртээсэн байна. Тус хотод оройн 20 цагаас хойш хөл хорио тогтоосон боловч хорио цээрийг үл хайхран жагсагчид жагсаалаа үргэлжлүүлсэн байна. Reuters-ийн ажилтны хэлснээр цагдаагийн офицер бичлэг хийж байхад нь үрлэн сумтай буугаар шууд гал нээсэн гэжээ.

Мөн Вашингтонд Цагаан ордны ойролцоо ням гарагийн орой ажиллаж байсан ВВС сувгийн зураглаачийг хэв журам сахиулах цагдаа бамбайгаар гэмтээсэн байна. Зураглаачийн хэлснээр хэвлэл мэдээллийн ажилтан гэдэг нь тодорхой байсан ч цагдаагийн ажилтан шууд дайралт хийжээ. Мөн ням гарагт Калифорнийн Лонг Бийчэд радиогийн сурвалжлагч Адолфо Гузман Лопезын хүзүү рүү офицер үрлэн сумтай буугаар буудсан хэрэг гарсан байна.

I just got hit by a rubber bullet near the bottom of my throat. I had just interviewed a man with my phone at 3rd and Pine and a police officer aimed and shot me in the throat, I saw the bullet bounce onto the street @LAist @kpcc OK, that’s one way to stop me, for a while pic.twitter.com/9C2u5KmscG

— Adolfo Guzman-Lopez (@AGuzmanLopez) June 1, 2020

 

Энэ мэтчилэн АНУ-д газар авч буй жагсаал мөргөлдөөнийг сурвалжилж буй Франц, Германы олон улсын хэвлэл мэдээллийн ажилтнуудын бие халдсан тохиолдлуудыг холбогдох орон нутгийн цагдаа нарт мэдэгдэхэд хэрэгт холбогдолтой ажилтнуудыг мөрдөн шалгая гэсэн хариуг өгчээ. Харин Ерөнхийлөгч Дональд Трамп сэтгүүлч сурвалжлагчид халдлагад өртсөн хэргийг төдийлөн ойшоохгүйгээр барахгүй өөрсдийнх нь алдаа мэтээр харж байна.

Харин хэвлэлийн эрх чөлөөний байгууллагууд үүнийг буруутгасан байр сууриа илэрхийлсээр байна.

Эх сурвалж: ВВС

---