Дорноговь аймгийн Замын-Үүд суманд автомашины ноцтой осол болж, нэг иргэн амиа алдсан бол нийслэлийн Хан-Уул дүүрэгт нэг иргэн усанд осолдсон байна.

Тодруулбал, Замын-Үүд сумаас Улаанбаатар чиглэлийн авто замын зорчих хэсэгт зогсож байсан иргэн С-ийн эзэмшлийн “Даюун” загварын ачааны автомашины хойд талаас иргэн А-ийн жолоодож явсан “Блюбирд” загварын суудлын автомашин мөргөж, автомашины төмөр хийцэд иргэн А хавчуулагдсан байна. Уг ослын улмаас “Блюбирд” загварын суудлын автомашиныг жолоодож явсан тус сумын харьяат иргэн А /30 настай, эрэгтэй/ нас баржээ.

Түүнчлэн Нийслэлийн Сонгинохайрхан дүүргийн 32 дугаар хороо, “Сонгинохайрхан” уулын зүүн талын тогтоол усанд хүн живсэн хэрэг гарчээ.

Нийслэлийн Хан-Уул дүүргийн 12 дугаар хорооны иргэн А /25 настай, эрэгтэй/-ын цогцсыг Нийслэлийн Аврах ангийн алба хаагчид 5 метрийн гүнээс олж гарган, тус дүүргийн Цагдаагийн 1 дүгээр хэлтсийн мөрдөгч, цагдаагийн ахмад Б.Жавзандуламаар ахлуулсан бүрэлдэхүүнд шилжүүлэн өгсөн байна.

---