ОХУ энэ жил ялалтын баярын 75 жилийн ойн жагсаалыг уламжлал ёсоор тавдугаар сарын 9-ний өдөр зохион байгуулахаар төлөвлөж байсан боловч коронавируст цар тахалтай холбогдуулан хойшлуулаад байсан юм. Тэгвэл Ерөнхийлөгч Владимир Путин хойшлогдсон баярын жагсаалыг зургадугаар сарын 24-ний өдөр хийхээр болсон гэдгийг мэдэгдсэн байна.

ОХУ өнгөрсөн долоо хоногуудад Европ дахь коронавирусийн шинэ голомт болоод байсан бол энэ долоо хоногоос халдварын тохиолдол харьцангуй тогтворжиж, оргил үеэ даван гарсан гэж үзэж байна.

Ялалтын баярын жагсаалын тов гарсан тул олон мянган цэрэг армийн алба хаагч бэлтгэл сургуулилалтдаа эргэн орно. Энэ хооронд Бразил улсад корнавирусийн 400,000 орчим батлагдсан тохиолдол бүртгэгдсэнээр ОХУ-ыг давлаа. Орост халдварын 362,000 тохиолдол бүртгэгдэж, 3,800 иргэн нас баржээ.

Хойд хөршид халдварын тархалт тогтвортой түвшинд очсон ч олон сая иргэн хорио цээрийн хатуу чанга дэглэмд гэрээсээ гарах хориотой хэвээр байна. Бусад орнуудтай харьцуулахад коронавирусийн улмаас нас барсан иргэдийн тоо харьцангуй бага байгаа ч 24 цагийн дотор 174 хүн нас барсан нь өнгөрсөн хугацаанд хамгийн өндөр үзүүлэлт болжээ.

Ерөнхийлөгч Путин өндөр дээд хэмжээний албаныхантай хуралдах үеэрээ Батлан хамгаалахын сайд Сергей Шойгуд хандан ирэх сард ялалтын баярын жагсаал хийхэд бэлдэхийг үүрэг болгов. Өнгөрсөн жилүүдийн жишгээс харахад Ялалтын баярт ОХУ-ын өнцөг булан бүрээс ирсэн 10,000 орчим цэрэг, алба хаагч, гадны төлөөлөгчид, ахмад дайчид оролцдог уламжлалтай.

Ялалтаа тэмдэглэхээс гадна улс төрийн чухал ач холбогдолтой жагсаалыг үзэж сонирхохоор Францын Ерөнхийлөгч Эммануэль Макрон, Хятадын дарга Си Зиньпин, Молдав, Казакстаны төр засгийн тэргүүнүүд уригдсан байсан юм.

Эх сурвалж: The Guardian

---