БНСУ-ын 27 настай эрэгтэйд коронавирусийн үеийн тусгаарлалтын дүрэм зөрчсөн хэргээр дөрвөн сарын хорих ял оноожээ. Уг хэрэг нь ийм төрлийн гэмт хэрэгт анх удаа хорих ял оноосон явдал болж байна.

Сөүл хотын эмнэлгээс эмчлэгдэн гарч, хоёр долоо хоногийн турш гэртээ өөрийгөө тусгаарлах ёстой байсан коронавирусээр халдварласан өвчтөн Кимийг ийнхүү шийтгэжээ. Тэрээр тусгаарлалтын 14 хоногийн хугацаа дуусахаас хоёр хоногийн өмнө дүрэм зөрчиж, гэрээсээ гарсан байна. Эхний удаад дүрэм зөрчихөд түүнийг буцааж гэрт нь хүргэсэн ч хоёр дахиа гэрээсээ гарахыг оролдсоноор баривчлан саатуулжээ.

Өмнөд Солонгос улсад хорио цээрийн дэглэмийг цуцалсны дараа шөнийн клубуудээс коронавирусийн халдвар голомтлон тархсан тул тусгаарлах дүрэм журмыг чандлан сахиулахаар хүчин чармайлт гаргаж байна. Тус улсад халдварын тохиолдол хоногт дунджаар 20 орчим илэрч байгаа ажээ.

Эх сурвалжийн мэдээлснээр БНСУ даяар 33,000 иргэн өөрийгөө тусгаарлаж байгаагийн дийлэнх нь гадны орнуудаас эх орондоо ирсэн иргэд байгаа юм. Тэдэнд цахилгаан бугуйвч зүүлгэн хөдөлгөөнийг нь хянаж байна. Энэ хооронд улс орон даяар 2,4 сая гаруй оюутан, сурагч маргаашнаас хичээлдээ явахаар бэлдэж байна.

Эх сурвалж: ВВС  

---