АМГТГ-аас  шатахууны үнийн асуудлаар мэдээлэл өглөө. Шатахуун импортлогч компаниудтай тохиролцон найман сарын хугацаанд буюу энэ оны арванхоёрдугаар сарыг дуустал А-92 шатахууны үнийг тогтвортой байлгахаар хэлэлцээр хийж шийдвэрлэсэн.

Энэ сарын 23–ны өдөр шатахууны үнэ дахин буурсан талаар АМГТГ-аас мэдээлэв:

• А-80 50 төгрөгөөр,
• А-92 80-100 төгрөгөөр,
• А-95 200 төгрөгөөр,
• Дизель түлшний үнэ литр тутамд 180 төгрөгөөр тус тус буурчээ.

Ингэснээр нийслэлд: 

• А-80 авто бензин 1350,
• А-92 авто бензин 1360,
• А-95 авто бензин 1800
• Дизель түлшний дундаж үнэ 1990 төгрөг болсон гэв.  

Хөдөө орон нутагт А-92 шатахууны хамгийн ихдээ 1670 төгрөг байх бол Улаанбаатарт А-92 шатахууны үнэ 1320-1420 төгрөгийн хооронд хэлбэлзэлж зарагдана.

Дэлхийн зах зээлд брэнт маркийн тосны үнэ буурсан тул манай улсад сүүлийн 3 сарын турш газрын тосны үнэ буурч байна. Өнгөрсөн дөрөвдүгээр сард 1 баррель шатахууны үнэ 19.5 ам.доллар байсан бол сүүлийн долоо хоногоос түүхий тосны 1 баррель нь 39 ам.долларт хүрч байгаа юм. Олон улсын зах зээлийн үнийн хэлбэлзэл манай хилийн үнэд нэг сарын дараа нөлөөлж эхэлдэг гэсэн юм.

Шатахууны нөөцийн хувьд хэвийн хэмжээнд байгаа гэдгийг дурдав. Шатахууны үнэ буурсны дараагаар А-92 шатахууны оронд А-80-ыг оронд нь борлуулж байна гэх хардлага иргэдийн дунд байсан. А-80 шатахуун А-92 шатахуунаас 10 дахин бага хувиар импортоор орж ирдэг. Ялангуяа нийслэл хотод 250 гаруй шатахуун түгээх станц байдгаас 40 гаруй нь А-80 зардаг. А-80 шатахууныг хөдөө орон нутгийн иргэд авдаг гэсэн юм.

---