Нийтэлсэн:   О.Тэргэл

4 жилийн өмнө

Москва хотын өмнөд хэсэгт байрлах "Ясный" орон сууцны цогцолборын нутаг дэвсгэрт өчигдөр буудалцаан болж, сэжигтнүүд хэргийн газраас автомашинаар зугтжээ.

Орон сууцны зогсоол дээр болсон уг мөргөлдөөнд дор хаяж найман хүн оролцсон бөгөөд буудалцаан дор хаяж 20 минут үргэлжилсэн хэмээн гэрчүүд мэдүүлжээ. Сэжигтнүүд гар буу болон “Сайга”, “Вепр” загварын агнуурын буунууд хэрэглэсэн байна. Буудлагын дараа тэд буцаад машиндаа суун зугтацгаасан бөгөөд цагдаа нар 10 орчим минутын дараа иржээ.

Гэрчүүдийн нэг, оршин суугч Алексейгийн хэлснээр ямар нэг хэрүүл маргаан гараагүй, шуудхан л буудалцаад эхэлсэн гэнэ. “Машинууд ирээд, хүмүүс шууд буугаад л бие бие рүүгээ буудаж эхэлсэн. Энэ дор хаяж 20 минут үргэлжилсэн. Тэдний нэг машинд дугаар байгаагүй" гэж мэдүүлжээ. Мөн тэрээр энэхүү буудлага болсон зогсоол дээр зодоон, зөрчилдөөн байнга гардаг талаар хэлсэн юм.

Одоогийн байдлаар цагдаа нар уг хэрэгтэй холбоотой есөн хүнийг баривчилжээ. Мөн буудалцааны үеэр нэг хүн шархадсан талаар албаныхан мэдэгдэв. "Шархадсан хүнийг оролцуулаад нийт есөн хүн баривчлагдсан бөгөөд тэдгээрийн оролцоог судалж байна" хэмээн цагдаагийн газрын эх сурвалж мэдээлсэн байна.

Саатуулагдсан хүмүүсийн дор хаяж дөрөв нь ОХУ-ын Уралын Оренбург хотоос гаралтай гэнэ. Одоогоор сэжигтнүүдийн маргалдааны шалтгаан тодорхойгүй байна.

Эх сурвалж: Тасс

Сурталчилгаа