Коронавирусийн цар тахлын улмаас дэлхий даяар улаанбурхан, халдварт саа, холер /булчин задрах тахал/ зэрэг өвчний эсрэг дархлаажуулалт тасалдан, 1 хүртэлх насны 80 сая хүүхдийн амь нас эрсдэлд ороод байгаа нь Дэлхийн эрүүл мэндийн байгууллагын хийсэн судалгаагаар илэрчээ.

Өнгөрөгч баасан гарагт дэлгэсэн шинэ тайланд дархлаажуулалтын мэдээлэл авах боломжтой 129 орны талаас илүү хувь нь гурав, дөрөвдүгээр саруудад вакцинжуулалтын үйлчилгээгээ хэсэгчлэн, эсвэл тэр чигээр нь зогсоосон талаар мэдээлсэн байна. Энэхүү тайланг НҮБ-ын Хүүхдийн сан, “Sabin” вакцины хүрээлэн, “GAVI” вакцины холбоо мөн хамт боловсруулсан аж.

ДЭМБ-ын ерөнхий захирал Тедрос Адханом Гебрейюсес мэдэгдэлдээ “Дархлаажуулалтын хөтөлбөрүүд COVID-19 тахлын улмаас тасалдсанаар улаанбурхан гэх мэт вакцинаар урьдчилан сэргийлэх боломжтой өвчнүүдийн эсрэг олон арван жилийн ахиц дэвшил сүйрэх аюул тулгараад байна” гэв.

Халдварт сааг устгахын тулд нийт хүүхдүүдийн 90 гаруй хувийг дархлаажуулах шаардлагатай байдаг бөгөөд олон сая эрүүл мэндийн ажилтнуудын оролцсон олон нийтийн кампанит ажил хийгддэг боловч хөл хорионы үед энэ нь хэт аюултай болоод байгаа юм.

Харин НҮБ-ын Хүүхдийн сангийн Гүйцэтгэх захирал Хенриетта Форе “Бид нэг өвчинтэй тэмцэхийн тулд бусад өвчнүүдийн эсрэг урт хугацааны ахиц дэвшлээ устгах ёсгүй. Улаанбурхан, халдварт саа, холерын эсрэг үр дүнтэй вакцинууд бидэнд бий. Нөхцөл байдал биднийг дархлаажуулалтын зарим ажлыг түр зогсоохыг шаардаж байгаа ч эдгээр ажлуудыг аль болох түргэн эргэн эхлүүлэх хэрэгтэй, эсвэл бид нэг үхлийн тахлыг нөгөөгөөр нь солих магадлалтай” гэлээ.

ДЭМБ энэ долоо хоногоос эхлэн коронавирусийн үеэр вакцинжуулалтын ажлыг хэрхэн аюулгүй хийх талаар улс орнуудад зөвлөгөө өгөх гэнэ.

Эх сурвалж: The Associated Press

---