Перу улсын нэгэн жижиг хотын дарга хөл хорионы дүрэм зөрчин, түүнийг баривчлахаар ирсэн цагдаа нараас нуугдахдаа авсанд орж, цогцос болж жүжиглэсэн талаар албаныхан мэдээлжээ.

Тус улсын Тантара хэмээх жижиг хотын Засаг дарга Жайми Роландо Урбина Торрес өнгөрөгч даваа гарагийн орой найзуудтайгаа гадуур архидан согтуурч байхад нь цагдаа нар хөл хорихоор ирсэн байна. Гэвч тэднийг ирэх үед Торрес коронавирусийн улмаас нас барсан өвчтөний дүр эсгэн, амны хаалт зүүгээд, нүдээ тас анин, онгорхой авсан дотор хэвтэж байсан гэнэ. Харин түүний найзууд тус өрөөний шүүгээнүүдэд нуугдсан байв.

Цагдаа нар Торресийг авснаас гарган, найзуудынх нь хамт байцаалт авахаар цагдаагийн хэлтэс рүү авч явсан боловч тэдэнд хэрэг үүсгэсэн эсэх нь тодорхойгүй байна. Удалгүй тэд түүний авсан доторх зургийг олон нийтэд дэлгэжээ.

Орон нутгийн хэвлэл мэдээллийн хэрэгслээр Засаг даргыг тахал өвчнийг нухацтай авч үзээгүй хэмээн шүүмжилж байна. Хөл хорио тогтоосноос хойш тэрээр Тантарад ердөө найман хоногийг л өнгөрөөж, олон нийтэд тогтоосон дэглэмийг үл хэрэгсжээ.

Перу нь Бразилын дараагаар Өмнөд Америкийн хамгийн хүнд байдалд орсон улс болоод байна. Тус улсад 120,000 гаруй батлагдсан коронавирусийн тохиолдол бүртгэгдэж, 3000 гаруй хүн нас бараад байгаа юм.

Эх сурвалж: Insider

---