Нидерландын шүүхээс ач зээ нарынхаа зургийг эцэг эхийнх нь зөвшөөрөлгүй авч Facebook, Pinterest зэрэг олон нийтийн цахим сүлжээнд байршуулсан эмээг бүх зургаа устгахыг шаарджээ. Фэйсбүкийн идэвхтэй хэрэглэгч ээжийнхээ талаар охин нь зарга үүсгэн шүүхэд хандсанаар маргаан таслагдсан байна.

Шүүх шийдвэрээ гаргахдаа Европын Холбооны ерөнхий мэдээллийг хамгаалах дүрмийн дагуу шийджээ. Настай эмэгтэй ач зээ нарынхаа зургийг эцэг эхээс нь зөвшөөрөл авалгүй оруулсны дараа хүүхдүүд нь устгахыг хүсчээ. Удаа дараа ээждээ хэлсэн боловч тэрээр устгахаас татгалзсанаар шүүхэд очсон байна.

Эмээ ач зээ нарынхаа зургийг устгахгүй бол тэдний зургийг байршуулсан хоног бүрт 50 еврогийн торгууль төлөх хэрэгтэй болов. Мөн зургуудыг устгаад зогсохгүй хойшид ч тэдний зургийг цахим сүлжээнд байршуулах эрхгүй ба хэрэв шүүхийн шийдвэр зөрчвөл хоногт 50 евро, дээд тал нь 1,000 еврогийн торгуультай ажээ.

Эх сурвалж: ВВС

---