Япон улсын Саппоро хотын эрх баригчид гуравдугаар сарын сүүлчээр нэг байшинд 238 муур амьдарч байсныг тогтоосон талаар өнөөдөр мэдэгджээ.

Энэхүү хэрэг байшингийн эзэн түрээсээ төлөөгүй оршин суугчидтай уулзахаар очиход энэ нь ил болсон байна. Байгаль орчны яамны мэдээлснээр тус улсад 200 гаруй муурыг нэг дороос олох нь маш ховор тохиолдол аж.

Саппорогийн Кита Уард дахь уг хоёр давхар байшинд 50-аад насны гэрлэсэн хос, 30-аад насны хүүтэйгээ амьдардгийг тогтоожээ. Байшингийн эзэн холбогдох албаны хүмүүст мэдэгдсэний дараа тус хотын Амьтны хяналтын төв болон Амьтан хамгаалах байгууллагын ажилчид байшинд ороход олон муур тураалд орсон харагдсан төдийгүй үхсэн муурын яс шалаар хөглөрч байжээ.

Амьтан хамгаалах байгууллагын нэг ажилтан "Нүдээ ч нээж чадахгүй яс арьс болсон муурууд бие биетэйгээ наалдан хэвтэцгээж байсан. Тэднээс өмхий үнэр үнэртэж байсан" гэв.

Хотын захиргаанд өгсөн мэдүүлэгтээ мууруудын эзэд тэднийг огт хөнгөлөөгүй талаар хэлсэн бөгөөд үүний улмаас тоо толгой нь ийнхүү хяналтаас гарчээ. Эдгээр 238 муурыг хотын Амьтан хяналтын төв асрамждаа авсан бөгөөд дийлэнх нь төрөл бүрийн амьтан хамгаалах байгууллагуудад шилжин, шинэ эзэнтэй болсон байна.

Гудамжны мууруудыг хамгаалах үйл ажиллагааг эрхэлдэг нэгэн ашгийн бус байгууллагын тэргүүн Тамами Кацута байшин доторх тааруу орчныг шүүмжлэн “Тэдэн дунд сонсгол нь алдагдаж байгаа гэх мэт эрүүл мэндийн асуудал үүсэж буй муур олон байсан. Эдгээр хүмүүсийн хараан дор үүссэн нэг төрлийн үржүүлгийн газар нь амьтны эрхийг зөрчсөн нь тодорхой байгаа тул тэдэнд хариуцлага хүлээлгэх ёстой" гэжээ.

Орон нутгийн цагдаа нар уг хэрэгтэй танилцаж байна. Харин байшингийн эзэн Саппорогийн дүүргийн шүүхэд нэхэмжлэл гаргасны дагуу гурван оршин суугч гуравдугаар сарын сүүлээр байшингаас нүүн гарчээ.

Эх сурвалж: Japan Today

---