Итали улсад коронавирусийн халдварын тоо буурснаар бүс нутгийн эрх баригчид энэ долоо хоногоос эхлэн зарим хязгаарлалтыг цуцлахаар болжээ. Даваа гарагаас баар, ресторан, дэлгүүр, зах, үсчин, гоо сайхан болон бусад аж ахуйн нэгжүүд эргэн нээгдэх боломжтой болсон. Мөн сүм, музейнүүд ч үүд хаалгаа нээж эхлээд байгаа юм.

Спорт заал, усан бассейн, спортын төвүүд энэ сарын 25-нд, харин кино театр, урлагийн театрууд ирэх зургаадугаар сарын 15-нд нээгдэх гэнэ. Түүнчлэн Италиас гарах, орох болон орон нутгийн аялал зургаадугаар сарын 3-наас эхлэн чөлөөтэй болох аж. Мөн Европын Холбооны орнуудын жуулчид тус улсад зочлохдоо хоёр долоо хоногийн тусгаарлалтад орох шаардлагагүй болно.

Life was slowly returning to the streets of the Italian capital on Monday, as #Rome eased restrictions imposed due to the #coronavirus pandemic. pic.twitter.com/DIRvVKbiCZ

— Ruptly (@Ruptly) May 19, 2020

Нийслэл Ром хот дэлхийн хамгийн урт хугацааны коронавирусийн хөл хорионы дараа урьдын өдөр тутмын амьдралдаа эргэн орж байна. Италийн албаны хүмүүсийн мэдээлснээр тус улсад 32,169 хүн халдварын улмаас нас баржээ. Энэ нь АНУ болон Их Британийн дараагаар гурав дахь өндөр үзүүлэлт юм.

Харин Ерөнхий сайд Жузеппе Контегийн хэлснээр Итали улс хөл хориогоо сулруулснаар тодорхой хэмжээний эрсдэл хүлээж байгаа аж. Тэрээр “Халдварын дэгдэлт дахин өсөж магадгүй ч Итали улс вакцин гарахыг хүлээгээд суух боломжгүй” гэжээ.

Эх сурвалж: BBC, Sputnik News

---