УИХ-ын Өргөдлийн байнгын хорооны хуралдаанаар Үндэсний аудитын газраас 2018 онд “Цэвэр агаар сан”-д хийсэн гүйцэтгэлийн аудитын тайланг сонслоо. Энэ үеэр Гүйцэтгэлийн аудитын газрын захирал бөгөөд Тэргүүлэх аудитор Л.Одгэрэл мэдээлэл хийсэн бөгөөд олон зөрчил илэрснийг дурдав.

Тодруулбал, тэрбээр “Агаарын чанарын үзүүлэлтээс харахад бохирдол 2014 оноос өссөн байна. Өнгөрсөн 2008 онд хоёр тэрбум, 2009 онд нэг тэрбум, 2011 онд 52 тэрбум, 2013 онд хоёр тэрбум, 2014 онд 32 тэрбум төгрөгийн зөрчил гарсан. Нийт 100 гаруй тэрбум төгрөгийн зөрчил илэрсэн. 2011-2013 онд утаагүй зуух, сайжруулсан түлш гэх мэт арга хэмжээ авсан учраас утааны хэмжээ бага зэрэг буурсан. Гэвч эцсийн үр дүнд утааны найрлагын хэмжээ, тоосонцрын хэмжээ буурсан эсэхийг дүгнээгүй байна.

Мөн төрийн байгууллагуудын мэдээлэл хоорондоо зөрүүтэй байсан. Зарим олдсон материал нь гарын үсэг, тамга тэмдэггүй байсан. Тэгэхээр агаарын бохирдлыг бууруулах арга хэмжээг хэрэгжүүлэх явцад дотоод хяналт шалгалт, хариуцлагын асуудал орхигдсон гэж дүгнэж байна. Иймд 41 албан тушаалтанд хариуцлага тооцуулахаар хуулийн байгууллагад зөвлөмж хүргүүлээд байна” гэсэн юм. Мөн энэ үеэр УИХ-ын гишүүн Б.Энх-Амгалан сайжруулсан түлшний үйлдвэр байгуулах нэрийдлээр их хөрөнгө зарцуулсан нь ажил хэрэг болсон эсэхийг тодруулав. Нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан “ДЦС-2” ТӨХК-ийг түшиглэн байгуулсан 210000 тонн хагас коксжсон шахмал түлшний үйлдвэр ажиллаагүй гэсэн тайлбар өглөө.

Түүнчлэн хуралдаанаар тус Байнгын хорооны тогтоолын хэрэгжилтийн талаар мэдээлэл сонсов. Энэ үеэр Нийслэлийн Гэр хорооллын дэд бүтцийн газрын дарга Ч.Батбилэг “Одоогийн байдлаар гэр хорооллын газрыг дахин төлөвлөн барилгажуулах төслийн хүрээнд 1712 нэгж талбарын газрыг чөлөөлөн 10278 айлын орон сууцны барилга эхлүүлж 5477 айлын орон сууцыг ашиглалтад оруулсан байна. Энэ оны III улирлын байдлаар 280 айлын орон сууц ашиглалтад оруулсан бөгөөд дахин 2233 айлын орон сууц ашиглалтад оруулна гэж төсөл хэрэгжүүлэгч компаниуд төлөвлөгөө ирүүлсэн” гэлээ.

---