Энэтхэг улсын Баруун Бенгал, Одиша олон хөрш Бангладешийн эргийн бүс нутгийг энэ долоо хоногт Амфан супер хар салхи дайран өнгөрөхийг цаг уур судлаачид сэрэмжлүүлж байна. Хар салхинаас урьтаж Энэтхэгийн Засгийн газар хорио цээрийн үеэр сая гаруй иргэнийг аюулгүй газарт нүүлгэн шилжүүлэхээр бэлдэж байгаа ажээ.

Лхагва гарагт хар салхи Энэтхэгийн зүүн, Бангладешийн эргийн бүс нутгийг цагт 188 км-ын хурдтайгаар дайран өнгөрч хүчтэй хуй салхи, ширүүн бороо, хөрсний гулсалт дагуулна хэмээн сэрэмжилж байна. Одиша мужид нам дор болон далайн эрэгтэй ойр бүс нутгийн иргэдийг нүүлгэн шилжүүлэх бэлтгэл ажил хэдийнээ хангагдаж эхэлжээ. 550 гаруй орогнох газар, 7,000 орчим байшин барилгыг иргэдийг түр орогнуулахад бэлдэж байна.

Тус улсын цаг уурын газраас загасчдыг тавдугаар сарын 18-20-ны өдрийн хооронд аялалд гарахгүй байхыг зөвлөсөн байна. Онц байдалтай тэмцэх газрын ажилтнууд 40 орчим баг болон хуваагдаж үүрэг гүйцэтгэхээр болжээ. Гэвч байгалийн гамшигт үзэгдлийн хажуугаар халдварт цар тахал коронавирусээс урьдчилан сэргийлэхийн тулд нийтээс зай барих дүрэм хэрэгжиж байгаа тул эрүүл ахуйн дүрэм журмыг чандлан сахихыг уриалсан байна.

Энэтхэгт одоогоор коронавирусийн 90,000 гаруй тохиолдол бүртгэгдэж, 3,000 иргэн нас бараад байна. Ерөнхий сайд Нарендра Моди супер хар салхины өмнө урьдчилан сэргийлэх арга хэмжээ авахаар бэлтгэл ажлаа базаахыг шуурхай хуралдаанаар үүрэгджээ.

Амфан хуй салхийг 20 гаруй жилийн хугацаанд бүс нутгийг дайран өнгөрч буй хамгийн хүчтэй хар салхи болохыг сэрэмжлүүлж байна. 1999 онд Одишагийн эргийг супер хар салхи дайран өнгөрөхөд 9,000 гаруй иргэн амь насаа алджээ.

Эх сурвалж: The Guardian

---