АНУ-д аялж байсан жуулчин Хавайд баривчлагдан саатуулагджээ. 23 настай жуулчин эрэгтэй хорио цээрийн дэглэмийн үед далайн эргийн гэрэл зургийг Инстаграм хуудсанд байршуулсан нь буруудсан байна.

Хавайд 14 хоногийн хугацаанд коронавирусээс урьдчилан сэргийлэх хорио цээрийн дэглэм тогтоосон байгаа ажээ. Жуулчин О’ахуд өнгөрсөн долоо хоногийн даваа гарагт ирсэн бөгөөд ирсэн даруйдаа далайн эрэг дээр амарч, зугаалж буй зургуудаа Инстаграм хуудсандаа ээлж дараалан байршуулсан байна.

Албаны хүмүүс энэ зургийг харсан цахим сүлжээний бусад хэрэглэгч түүний сөрфинг хийж, наранд шарж буй зургийг харснаар даган дуурайхвий гэдгээс сэрэмжилжээ. Уг эрэгтэйн мэдээллийг дэлгэрэнгүй өгөхөөс татгалзсан байна. Хавайд  одоогоор коронавирусийн 700 орчим тохиолдол бүртгэгдэж, 20 орчим хүн нас баржээ. Дэлхийн аялал жуулчлалын төв болсон үзэсгэлэнт арлын эрх баригчид халдварт вирусийн тархалтыг зогсоохын тулд 14 хоногийн хугацаанд хорио цээрийн дэглэмд шилжээд байгаа юм.

Тиймээс эрх баригчид энэ хугацаанд иргэд болон зочид, аялагчдыг гэр, зочид буудлаасаа гарахгүй байхыг шаардаж, амарч зугаалж буй нь баримттайгаар баригдвал гэмт хэрэгт тооцож, 5,000 ам.долларын торгуулиас жилийн хугацаанд хорих хүртэл ял шийтгэл оноохоор болжээ.

Уг дүрмийг зөрчсөн олон аялагч баригдсан байгаагийн дунд бал сараа өнгөрөөхөөр Хавайд ирсэн хосууд ч багтсан ажээ.

Эх сурвалж: CNN

---