АНУ-ын Ерөнхийлөгч асан Барак Обама өнгөрөгч бямба гарагт болсон их сургулуийн цахим төгсөлтийн баяраар төгсөгчдөд хандан үг хэлэхдээ АНУ-ын удирдагчдын коронавирусийн эсрэг авч хэрэгжүүлж буй бодлого, арга хэмжээг шүүмжилжээ.

Тэрээр "Бүхнээс илүү, энэ тахал маш олон удирдлагын хүмүүс юу хийж байгаагаа огтхон ч мэддэггүй гэдгийг нээн таниуллаа. Тэдний зарим нь хариуцлага хүлээж байгаа дүр ч эсгэхгүй байна" гэж хэлжээ.

Хар арьстнуудын түүхэн коллеж, их дээд сургуулийг төгсөж буй оюутнуудад зориулсан, хоёр цаг орчим үргэлжилсэн "Show Me Walk, HBCU Edition" арга хэмжээний үеэр Обама ийнхүү хэлсэн байна. Тэрээр зөвхөн коронавирус төдийгүй одоогийн нийгэм, эдийн засагт өрнөж буй үйл явдлын талаар ярьжээ. 

Тэрээр ийнхүү ярихдаа Ерөнхийлөгч Доналд Трамп болон бусад холбоо, мужийн албан тушаалтнуудын хэн нэгний нэрийг хэлсэнгүй. Гэхдээ энэ сарын эхээр Обама өөрийн 3000 засаг захиргааны ажилтнуудтай утсаар ярихдаа  Трампын цар тахлын эсрэг хариу үйлдлийг “эмх замбараагүй гамшиг” хэмээн хатуу шүүмжилсэн юм.

Төгсөлтийн арга хэмжээнүүдийн үеэр Обамагийн хэлсэн үгс түүнийг ирэх сонгуульд улам идэвхтэй үүрэг гүйцэтгэхээр зорьж буйн илрэл болж байна. Тэрбээр албан тушаалаа Трампад өгснөөс хойш гурван жилийн хугацаанд олны анхаарлын төвөөс холуур байсан. Харин саяхан тэрээр түүний дэд ерөнхийлөгчөөр ажиллаж байсан Жо Байденийн төлөө "хэрэгцээт бүх цаг заваа зарцуулж, бүх хүчин чадлаараа дэмжих болно" хэмээн мэдэгдсэн удаатай.

Эх сурвалж: apnews.com

---